Er en sia ultima sesida da quest onn ha la regenza grischuna tractà diversas fatschentas communalas e regiunalas. 

Da vischnancas e da regiuns 

• San Vittore: Il project "Protecziun cunter crudada da crappa, via da Giova" che l'uffizi da guaud e privels da la natira ha inoltrà per incumbensa da la vischnanca da San Vittore vegn approvà. I vegn garantida ina contribuziun da maximalmain 219 000 francs. Cun il project vegn segirada la via da guaud a la fracziun da Giova cunter crudada da crappa.
• Tujetsch: Il project "Segirada da la spunda d'Arschella" che l'uffizi da guaud e privels da la natira ha inoltrà vegn approvà. Als custs vegn garantida ina contribuziun da maximalmain 288 750 francs. A l'ost da Sedrun, tranter Bugnei e Garmischeras tar Arschella vegn stabilisà il trassé da la Viafier Matterhorn-Gottard.
• Sur (Valragn): Il project "Ovra idraulica d'aua da baiver" da la vischnanca da Sur (Valragn) vegn approvà cun cundiziuns. L'ovra d'aua currenta planisada da la vischnanca duai avair ina prestaziun installada da 90 kilowatts. La producziun annuala, cun la quala i vegn fatg quint, importa 535 000 kWh (media dal consum annual d'electricitad da var 120 chasadas). I vegn fatg quint cun custs d'investiziun da circa 1 115 000 francs.
• Andeer: A la sanaziun dal tetg da plattas da crap da la baselgia evangelica d'Andeer vegn garantida – ultra da la contribuziun chantunala deliberada il november 2013 – ina contribuziun or da meds finanzials federals da maximalmain 22 050 francs.
• Domat: La revisiun parziala da la constituziun communala da la vischnanca da Domat dals 24 da november 2013 vegn approvada. Cun quella vegn introducida la pussaivladad da far votaziuns da variantas en chaussas communalas.
• Ilanz/Glion: La lescha da taglia dals 24 da november 2013 da la vischnanca dad Ilanz/Glion (fusiunada da nov per il 1. da schaner 2014) vegn approvada.
• Val Stussavgia: La lescha davart las taxas da cura da la vischnanca da Val Stussavgia dals 18 da november 2013 vegn approvada.
• Partenz davant: Il project per engrondir la serenera da Seewis dal consorzi per aua persa dal Partenz davant vegn approvà. La contribuziun chantunala importa 824 432 francs.
• Surses: Ils statuts dal "Consorzi da scola Surses" vegnan approvads.
• Engiadina bassa: Il project da la Pro Engiadina bassa per construir da nov ina via da velos da Vinadi fin al cunfin da la Svizra a Vestmezia vegn approvada. I vegn garantida ina contribuziun chantunala da maximalmain 178 750 francs. Quest traject è ina part integrala dal project d'ina via da velos dad Ovella fin al cunfin svizzer ch'è separada da la via d'Engiadina frequentada fermamain.

Contribuziuns chantunalas a differentas instituziuns 

• Institut da perscrutaziun AO Tavau (ARI): A l'institut da perscrutaziun AO Tavau (ARI) vegn garantida ina contribuziun da totalmain 1,27 milliuns francs per ils onns 2014 fin 2017. Per l'onn 2014 èn quai 220 000 francs. 2015, 2016 e 2017 vegnan concedids 350 000 francs per onn – premess che la vischnanca da Tavau paja per ils onns 2014 fin 2017 ina contribuziun al ARI ch'è almain uschè gronda sco fin ussa. Resalvada resta la concessiun dals credits necessaris tras il cussegl grond. La AO Foundation è in'organisaziun ch'è activa sin tut il mund en il sectur da la perscrutaziun e da la scolaziun medicinala. Il ARI ha sco institut il pli grond ina plazza globalmain fitg impurtanta en ils secturs da perscrutaziun da la AO Foundation.
• Pro senectute dal Grischun: Sa basond sin in nov contract da prestaziuns per ils onns 2014 fin 2017 vegnan pajadas a la Pro senectute dal Grischun ina pauschala sco er ina indemnisaziun tenor prestaziun da tut en tut maximalmain 335 000 francs per onn.
• Uniun chantunala da chant dal Grischun: A l'uniun chantunala da chant dal Grischun vegn garantida ina contribuziun dad annualmain 20 000 francs per ils onns 2014 fin 2016. Vitiers vegnan ina garanzia da deficit annuala da maximalmain 15 000 francs a las emnas da chant per chors da scolaras e scolars e da giuvenils sco er contribuziuns annualas als curs spezials da tut en tut maximalmain 15 000 francs.
• Associaziun grischuna per il teater popular: A l'associaziun grischuna per il teater popular vegn garantida ina contribuziun annuala da 15 000 francs per ils onns 2014 fin 2016. Per curs spezials vegnan concedidas contribuziuns annualas da tut en tut maximalmain 9500 francs.

Per la fin da l'onn
Durant l'onn che va a fin ha la regenza grischuna salvà 41 sesidas. Ella ha prendì 1281 conclus (onn precedent: 1246).
President da la regenza daventa il 1. da schaner 2014 Mario Cavigelli, schef dal departament da construcziun, traffic e selvicultura. Vicepresident daventa il cusseglier guvernativ Martin Jäger, schef dal departament d'educaziun, cultura e protecziun da l'ambient.
La regenza giavischa a tut las conburgaisas ed a tut ils conburgais bels e paschaivels dis da festa e per l'onn nov tut il bun e buna sanadad. 
 

Gremi: regenza
Funtauna: rg chanzlia chantunala dal Grischun