Il departament d'educaziun, cultura e protecziun da l'ambient ha nominà dunna dr. Andrea Kauer Loens sco nova directura dal museum retic a Cuira. Ella vegn ad esser en funcziun a partir dal matg 2014 en il museum retic che tutga tar l'uffizi da cultura. 

Andrea Kauer Loens succeda Jürg Simonett che ha manà il museum durant 12 onns e che va anticipadamain en pensiun la primavaira 2014. Andrea Kauer Loens ha 37 onns ed ha studegià germanistica ed istorgia a la facultad filosofica da l'universitad da Turitg. Suenter in praticum en il museum naziunal a Turitg è ella sa deditgada per trais onns sco assistenta en il seminari da germanistica da l'universitad da Turitg a projects da perscrutaziun, da redacziun e d'intermediaziun. Dapi l'onn 2007 lavura Andrea Kauer Loens en il museum retic. Sco collavuratura scientifica è ella stada manadra da projects per numerusas exposiziuns spezialas e per numerusas occurrenzas accumpagnantas ed ha er tgirà la collecziun dal museum retic. Dapi l'onn 2009 è ella la substituta dal directur dal museum.


Fotografia agiuntada: Andrea Kauer Loens, nova directura dal museum retic a Cuira 


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient