La regenza grischuna sustegna ina meglra indemnisaziun dals medis da chasa. Ella beneventa in'ordinaziun correspundenta da la confederaziun. Plinavant ha la regenza approvà pliras revisiun da planisaziuns localas. 

La revalitaziun da la medischina da chasa vegn beneventada
La regenza grischuna beneventa la meglieraziun da la posiziun da la medischina da chasa ch'il cussegl federal prevesa da far cun adattar las structuras tariffaras en l'assicuranza da malsauns. L'ordinaziun correspundenta dal cussegl federal prescriva ch'ils medis da chasa pon quintar en il futur indesch puncts da taxa dapli per mintga consultaziun en lur pratica. Quai correspunda ad in supplement medi da 9,80 francs. Uschia pon en il futur ils medis da chasa vegnir indemnisads meglier per las prestaziuns medicinalas ch'els furneschan. En tut signifitgescha quai entradas supplementaras d'annualmain circa 200 milliuns francs per ils provediders da basa. Questa meglieraziun vegn fatga senza chaschunar custs supplementars, mo tras respargns tariffars tar tschertas prestaziuns tecnicas.
Ord vista da la regenza grischuna sto la disposiziun da l'ordinaziun anc vegnir cumplettada: Er per ospitals en ina regiun che garanteschan il provediment da la populaziun cun medis da chasa tras lur medis, sto vegnir applitgà il supplement per prestaziuns dal medi da chasa en sia pratica. En las regiuns d'ospital dal Surses, da la Val Müstair e da la Bregaglia èn ils ospitals ils unics provediders da basa da la populaziun, medis che pratitgeschan en moda libra na datti betg en questas regiuns. 

Puspè 290 novs contingents d'abitaziuns da vacanzas
Per l'onn 2014 survegn il chantun Grischun – analogamain als onns precedents – da la confederaziun en total 290 permissiuns da contingent per l'acquist d'abitaziuns da vacanzas tras persunas a l'exteriur. La regenza ha repartì ils contingents da l'onn 2014 sco suonda: 240 contingents per objects en surbajegiadas cumplettas e 50 contingents per l'acquist d'objects singuls. Ultra da quai dastgan ils 276 contingents che n'èn betg vegnids duvrads durant l'onn precedent vegnir transferids sin l'onn current.
L'ordinaziun federala davart las abitaziuns secundaras che limitescha la construcziun da novas abitaziuns secundaras dapi il 1. da schaner 2013 en la gronda part da las vischnancas grischunas, n'excluda betg l'acquist da bains immobigliars da vacanzas tras persunas a l'exteriur. Particularmain l'acquist d'abitaziuns da vacanzas entaifer il spazi d'abitar existent e l'acquist d'unitads d'abitar che vegnan administradas en il rom da furmas d'alloschament structuradas restan vinavant suttamess a l'obligaziun da dumandar ina permissiun, e quai en il rom dal contingent chantunal. 
 

Da vischnancas e da regiuns 

• Churwalden: La regenza ha approvà l'ultima part da la revisiun parziala da la planisaziun locala ch'era vegnida concludida da la vischnanca da Churwalden ils 2 d'october 2012. La revisiun da la planisaziun locala substituescha ils differents meds da planisaziun da las trais vischnancas da Malix, da Churwalden e da Parpan che han fusiunà per il 1. da schaner 2010, cun ina planisaziun d'utilisaziun unitara, omogena e moderna per la nova vischnanca da Churwalden. Ad interim resta sistida la procedura d'approvaziun per la nova zona centrala Portal a Churwalden.
• Mesauc: La revisiun parziala da la planisaziun locala, concludida da la vischnanca da Mesauc ils 12 da mars 2012, vegn approvada cun resalvas. Singulas zonas d'edifizis d'abitar ch'èn vegnidas concludidas da nov vegnan returnadas a la vischnanca per las repassar, e quai pervia da la mancanza d'in basegn cumprovà.
• Tavau: La revisiun parziala da la planisaziun locala, concludida da la vischnanca da Tavau ils 14 da matg 2013, vegn approvada. La revisiun parziala cuntegna per l'ina differentas cumplettaziuns minimalas da las zonas che sa chattan en il sectur transitoric tranter guaud e zonas da construcziun inclusiv zonas verdas respectivamain tranter guaud e zonas d'agricultura e per l'autra differentas pitschnas correcturas da zonas.
• Nufenen: La revisiun parziala da la planisaziun locala da la vischnanca da Nufenen, concludida ils 20 da zercladur 2013, vegn approvada. Adattads vegnan differents meds da planisaziun (tranter auter zona da protecziun da la cuntrada e zona da protecziun da la natira). Plinavant èn vegnidas fatgas in'examinaziun ed in'adattaziun da las zonas ordaifer il territori dal vitg.
• Puntraschigna: La revisiun parziala da la planisaziun locala, concludida da la vischnanca da Puntraschigna ils 24 d'october 2013, vegn approvada. Quella cumpiglia in plan da zonas e plan general da furmaziun 1:1000 "hotel Müller". Il motiv per la revisiun parziala è stada in'amplificaziun previsa dal cumplex d'hotel.
• Samedan: La revisiun parziala da la planisaziun locala da la vischnanca da Samedan dals 27 d'october 2011 vegn approvada. La nova planisaziun d'utilisaziun creescha essenzialmain ina zona d'hotels e d'abitar en il territori Sper l'En. Là duain vegnir realisadas emprimas abitaziuns sco er in hotel.
• Val S. Pieder: La revisiun parziala da la planisaziun locala da la vischnanca da Val S. Pieder, concludida ils 22 da settember 2013, vegn approvada. La revisiun parziala cuntegna midadas dal plan da zonas 1:2000 territori da construcziun, dal plan da zonas 1:5000 Hüschiquelle sco er dal plan da zonas 1:5000 Gadastatt.
• Ardez: La revisiun parziala da la constituziun communala da la vischnanca dad Ardez dals 29 d'october 2013 vegn approvada. Il motiv per la revisiun parziala è il project d'ina fusiun da las vischnancas dad Ardez, da Ftan, da Guarda, da Scuol, da Sent e da Tarasp, dal qual l'entrada en vigur è previsa per il cumenzament da l'onn 2015. La perioda d'uffizi da las commembras e dals commembers da las autoritads vegn prolungada correspundentamain.
• Schlarigna: La revisiun parziala da la constituziun communala da la vischnanca da Schlarigna dals 3 da zercladur 2013 vegn approvada. Il motiv per la revisiun è l'introducziun d'ina direcziun da scola, per ch'il cussegl da scola possia sa concentrar sin las incumbensas strategicas. Quai pretenda in dumber pli pitschen da commembras e commembers dal cussegl da scola.
• Samignun: Il project per construir rempars per il Schergenbach en la vischnanca da Samignun vegn approvà. I vegn garantida ina contribuziun chantunala da totalmain 118 250 francs. Realisadas vegnan mesiras da la correcziun dals curs d'aua en l'intschess da duana a Spissermühle che servan a proteger cunter auas grondas.

Projects da vias
Ultra da quai ha la regenza approvà 150 000 francs per lavurs da construcziun sin il suandant traject:
- via da la Chlus, Landquart – Grüsch: lavurs d'impressari e da cuvrida, punt da la Landquart, Felsenbach 


Gremi: regenza
Funtauna: rg chanzlia chantunala dal Grischun