Cusseglier guvernativ Christian Rathgeb, schef dal departament da giustia, segirezza e sanadad, e Markus Kobler, cumandant dal corp da guardias da cunfin III, èn sa scuntrads oz cun las autoritads communalas dal Puschlav per orientar davart la situaziun da segirezza en la regiun da cunfin.

Perquai che las controllas da cunfin èn vegnidas abolidas en il territori da Schengen è il turissem criminal creschì en Svizra. En spezial èn vegnids registrads dapli malfatgs da facultad respectivamain enguladitschs cun infracziun. En il Grischun èn pertutgadas oravant tut las regiuns per lung da l'axa da transit A13 sco er la Surselva. En il Puschlav è il dumber d'enguladitschs cun infracziun sa redublà a 15 l'onn 2013, quai che ha segiramain influenzà il sentiment da segirezza en la val. 

La criminalitad vegn cumbattida energicamain
Sco che cusseglier guvernativ Christian Rathgeb ha punctuà oz tar la scuntrada cun las autoritads dal Puschlav, vegn la situaziun en la val, ma er en la Vuclina vischina, observada permanentamain. La polizia chantunala dal Grischun s'occupa seriusamain da la situaziun en il Puschlav ed ha instradà mesiras. Uschia èn las prioritads d'acziun en tut il Grischun vegnidas spustadas pli fitg en direcziun d'activitads da la polizia da segirezza e da la polizia criminala. Ultra da quai èn vegnidas fatgas differentas acziuns sistematicas, per part en collavuraziun cun il corp da guardias da cunfin. Per far energicamain frunt a l'augment dal turissem criminal s'engascha cusseglier guvernativ Rathgeb per in rinforz dal corp da polizia e per ina stretga collavuraziun cun il corp da guardias da cunfin sco er cun l'exteriur vischin. Da vart da la polizia vegn actualmain examinà, sch'i duess vegnir creada ina gruppa d'acziun mobila che pudess entrar en acziun sin tut il territori chantunal, ed uschia en spezial er en il Puschlav. Sche l'effectiv da la polizia chantunala duai vegnir engrondì vegn a stuair decider il cussegl grond. 

La duana sustegna il Puschlav
L'examinaziun dal dispositiv è er ina incumbensa directiva permanenta per l'administraziun da duana. En quest connex sa tracti d'examinar l'organisaziun e la disposiziun existenta e da las adattar a las novas ristgas. L'annunzia d'adattar il dispositiv da duana en il Grischun ha irrità la populaziun dal Puschlav. La direcziun da circumdari da duana da Schaffusa ed il commando da la guardia da cunfin a Cuira mettan perquai in grond pais sin l'explicaziun da las decisiuns prendidas. Ils fatgs èn ils suandants:
Al passagi dal cunfin a Campocologno pon las controllas dal traffic da rauba vegnir liquidadas sco fin ussa da glindesdi fin venderdi da las 7.30 a las 12.00 e da las 13.30 a las 17.30. La sonda da nov sin preannunzia. Il team existent vegn rinforzà cun in collavuratur supplementar. En il traffic da persunas vegnan abolids ils temps da controlla fixs. Grazia a l'utilisaziun da las sinergias cun la duana civila vegnan ils viagiaturs a pudair profitar er en l'avegnir dals servetschs durant ils temps da controlla. Ordaifer quests temps pon las annunzias da dazi vegnir fatgas sco fin ussa tras ina procedura da decleranza persunala (chascha da brevs).
Las acziuns da la guardia da cunfin n'èn betg pli liadas als temps da controlla. Ellas pon vegnir fatgas en moda flexibla areguard il temp confurm a la situaziun, ma er en moda surprendenta al passagi dal cunfin u en il territori da cunfin. Uschia poi vegnir reagì en moda svelta la notg u p.ex. durant las fins d'emna sin cas, e quai cun controllas sistematicas e cun acziuns concentradas. La stretga collavuraziun cun la polizia chantunala vegn cuntinuada.

L'effectiv da set guardias da cunfin na vegn betg midà. Las guardias da cunfin che vegnan pensiunadas anticipadamain ils proxims onns vegnan remplazzadas successivamain. Quatter aspirants da lingua materna taliana han cumenzà ils 6 da schaner 2014 la scolaziun da guardia da cunfin a Liestal. 
 

Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- colonel Markus Kobler, cumandant da la regiun da guardias da cunfin III, tel. 081 257 58 00, e-mail Markus.Kobler@ezv.admin.ch  
 

Gremi: departament da giustia, segirezza e sanadad
Funtauna: rg departament da giustia, segirezza e sanadad