Il vote électronique daventa anc pli transparent. Ils chantuns participads simplifitgeschan l'access al code da funtauna da lur sistems da la segunda generaziun. E in consorzi lavura il Grischun ensemen cun set auters chantuns vi d'in sistem segir per vote électronique ch'è vegnì sviluppà vinavant tecnicamain.

Il consorzi vote électronique, dal qual fan part a partir da l'onn 2014 otg chantuns (1), il chantun Genevra (ses sistem vegn duvrà da trais ulteriurs chantuns (2) per votar sin via electronica via internet) ed il chantun Neuchâtel, che ha in agen sistem, sviluppeschan actualmain vinavant lur sistems.
La finamira da quest ulteriur svilup è la realisaziun da las pretensiuns dal terz rapport dal cussegl federal davart il vote électronique da la stad 2013 e da la nova basa giuridica federala per la votaziun electronica ch'è entrada en vigur per ils 15 da schaner 2014.
En il center stat en quest connex l'introducziun d'ina pussaivladad per verifitgar las votaziuns. Ultra da quai duai vegnir garantì l'access senza barrieras als sistems, uschia che era persunas cun impediments pon votar en moda autonoma e resguardond il secret da votaziun.
Ils chantuns involvids han l'intenziun da facilitar l'access al code da funtauna da lur sistems sviluppads. In code da funtauna è in text scrit en ina lingua da programmar d'in program da computer. Quest pass augmenta la transparenza ed è pia ina mesira impurtanta per stgaffir confidenza.

• Il chantun Genevra dispona dapi l'onn 2010 d'ina basa giuridica che permetta l'access al code da funtauna (art. 60 lit. 10 da la lescha davart ils dretgs politics). Sin basa da quai ha il chantun Genevra pussibilità l'onn 2013 duas giadas l'access al code da funtauna.
• Il chantun Neuchâtel vul render accessibel il code da funtauna dal sistem da la segunda generaziun per utilisadras ed utilisaders registrads da l'uschenumnà "guichet unique".
• Il consorzi vote électronique vegn a publitgar uffizialmain il code da funtauna dal sistem da la segunda generaziun.

Il code da funtauna dals sistems da la segunda generaziun vegnan a star a disposiziun il pli baud l'enviern 2014/2015.
Dapi l'onn 2010 fa il Grischun – sco in da plirs chantuns da pilot – tests cun il vote électronique per las Svizras e per ils Svizzers a l'exteriur. La finamira è quella da dar fin l'onn 2019/2020 a tut las votantas ed a tut ils votants dal Grischun la pussaivladad da far diever dal vote électronique. L'onn 2016 duain cumenzar projects da pilot cun votantas e votants en il Grischun. Il vote électronique duai daventar il terz chanal da votaziun sper la votaziun a l'urna e sper la votaziun per correspundenza, ed avair il medem status sco quellas. 


Persunas da contact:
- chantun Grischun: chancelier dr. Claudio Riesen, tel. 081 257 22 21
- consorzi vote électronique: Stefan Langenauer, schef da l'uffizi da statistica da Turitg, tel. 043 259 75 01


(1) chantuns AG, TG, SH, SO, GR, FR, SG, ZH (a partir dal 1-1-2014)
(2) chantuns BS, BE, LU.


Gremi: consorzi vote électronique
Funtauna: rg chanzlia chantunala dal Grischun