Il museum d'art dal Grischun a Cuira cumenza l'onn 2014 cun duas novas exposiziuns. Dal favrer fin il matg 2014 pon ins scuvrir en la villa Planta las fotografias dal Bregagliot Andrea Garbald ed ils dissegns da l'artist David Weiss. Tuttas duas exposiziuns porschan invistas en ovras che n'èn anc mai stadas da vesair. Latiers pon ins guardar sin www.gr.ch in nov video da la chanzlia chantunala.

Andrea Garbald (1877 – 1958) è restà durant sia entira vita collià cun sia patria, la Bregaglia. El è stà il cronist da la val ed ha creà purtrets sco er maletgs da cartas postalas e fotografias da la cuntrada. Parallelamain ha el stgaffì in'ovra fotografica autonoma e sviluppà in'estetica dal maletg ch'è stada unica da ses temp. Il museum d'art dal Grischun preschenta per l'emprima giada en moda cumplessiva l'ovra d'Andrea Garbald sco fotograf e sco artist.

David Weiss (1946 – 2012) è in artist svizzer enconuschent sin plaun internaziunal, che ha lavurà dapi l'onn 1979 ensemen cun Peter Fischli e che ha chattà vasta renconuschientscha e gronda popularitad cun sias lavurs da sculptura, cun sias fotografias e cun ses videos. Main enconuschenta è sia ovra dissegnada ch'è naschida tranter ils onns 1968 e 1979 e ch'i vala ussa, dus onns suenter la mort da l'artist, da scuvrir da nov en l'exposiziun dal museum d'art dal Grischun.

La vernissascha publica da l'exposiziun ha lieu damaun, venderdi, ils 14 da favrer 2014, a las 18.00. 

Remartga:
Il video davart l'exposiziun stat a disposiziun sut www.gr.ch. 
 

Infurmaziuns:
Stephan Kunz, directur dal museum d'art dal Grischun, tel. 081 257 28 61


Gremi: museum d'art dal Grischun
Funtauna: rg museum d'art dal Grischun