La regenza ha relaschà ina nova glista dals ospitals per il provediment medicinal staziunar. La glista dals ospitals è il resultat d'ina planisaziun dals ospitals tenor criteris da basegn e da prestaziun. 

Approvà la nova glista dals ospitals
En il chantun Grischun datti ina nova glista dals ospitals. La regenza ha relaschà ina nova glista dals ospitals per il provediment medicinal staziunar, e quai retroactivamain per il 1. da schaner 2014. Ils ospitals che figureschan sin la glista adempleschan per il sectur acutsomatic ina incarica da prestaziun definida tenor categorias medicinalas. Mo las prestaziuns ch'èn inditgadas per mintga ospital sin la glista vegnan pajadas da las assicuranzas da malsauns e dal maun public. Exceptads da quai èn tractaments d'urgenza.
La nova glista dals ospitals è il resultat d'ina planisaziun dals ospitals tenor las prescripziuns ch'il legislatur federal ha fatg envers in provediment medicinal da la populaziun tenor criteris da prestaziun e da qualitad. En il center da la nova planisaziun dals ospitals na stattan betg pli las capacitads d'ospitalisaziun, mabain las prestaziuns medicinalas. La glista dals ospitals 2014, ch'è vegnida deliberada da la regenza, cuntegna in rapport davart la structura da la somatica acuta staziunara. Il rapport davart la structura cuntegna, sco resultat da la planisaziun dals ospitals, in'evluaziun dals furniturs da prestaziuns che vegnan en dumonda per ademplir il basegn prognostitgà. Tras la glista dals ospitals vegnan surdadas las incaricas da prestaziun. La glista è vegnida elavurada en collavuraziun cun tut ils ospitals dal Grischun. La planisaziun dals ospitals e la glista dals ospitals vegnan adattadas regularmain als interess da la populaziun, als svilups medicinals ed a las midadas structuralas.
La glista dals ospitals acutsomatics en il chantun Grischun, stadi dal schaner 2014, po vegnir consultada qua.

Per il sectur da la reabilitaziun sco er per il sectur da la psichiatria aveva la regenza relaschà gia avant atgnas glistas dals ospitals. Analogamain a la glista dals ospitals acutsomatics figureschan sin questas glistas tut las clinicas da reabilitaziun resp. tut las clinicas psichiatricas che adempleschan ina incarica da prestaziun tenor la planisaziun dals ospitals. La glista dals ospitals da la reabilitaziun en il chantun Grischun, stadi dal schaner 2014, po vegnir consultada qua. La glista dals ospitals da la psichiatria en il chantun Grischun, stadi dal november 2013, po vegnir consultada qua. 

Disposiziuns spezialas er per las conferenzas e per ils congress
Interpresas da servetsch che furneschan prestaziuns a curta vista per organisar e per realisar occurrenzas publicas duain en il futur dastgar profitar da disposiziuns spezialas dal dretg da lavur. Quai prevesa in nov sboz da l'ordinaziun federala tar la lescha da lavur. Uschia duain las interpresas da servetsch ch'èn activas a favur d'occurrenzas per exempel pudair ordinar da lavurar cumplainamain la notg e la dumengia, senza stuair dumandar ina permissiun da las autoritads. La regenza grischuna beneventa il sboz. En sia posiziun renviescha ella dentant al fatg che las disposiziuns spezialas stoppian valair expressivamain er per las prestaziuns da servetsch che stattan en connex cun la realisaziun da congress e da conferenzas. 
 

Da vischnancas e da regiuns 

• Val Müstair: Il plan general d'avertura 1:5000 "Alp Rifair", concludì da la vischnanca da Val Müstair ils 20 da favrer 2013, vegn approvà. Ils meds da planisaziun cumpiglian il project d'ina via agricula e forestala en il territori "Uad da Tuor" cun ina lunghezza da circa 450 meters. Il traject duai furmar ina part da la nova avertura da l'Alp Rifair che sa chatta en l'Italia vischina, sin circa 2150 meters sur mar. Per pudair garantir l'ulteriura existenza da l'Alp Rifair è indispensabla l'avertura tras ina via da vart da la Svizra. La lunghezza totala da la nova via fin a l'Alp Rifair importa circa 1,8 kilometers. Da quels traversa mo il traject da via da stgars 450 meters il territori da la Svizra. La via dastga vegnir duvrada mo per intents agriculs e forestals. La pregiudicaziun dal spazi da viver dals cots e da las giaglinas da taus e da draussa vegn reducida en quest lieu ad in minimum tras cundiziuns.
• Glion: La nova constituziun da la vischnanca da Glion ch'è entrada en vigur per il 1. da schaner 2014 e che datescha dals 22 da settember 2013 vegn approvada. 

Gremi: regenza
Funtauna: rg chanzlia chantunala dal Grischun