La regenza grischuna ha fixà per l'onn 2015 la part procentuala ch'il maun public paja als tractaments staziunars en in ospital. Ultra da quai ha la regenza tractà projects e fatschentas da vischnancas e da regiuns. 

Il tractament staziunar vegn finanzià a 55 pertschient dal maun public
La part dals custs da tractaments staziunars en in ospital ch'il chantun e las vischnancas portan è er l'onn 2015 la medema. La regenza ha fixà la part dal maun public vi dals custs da las pauschalas per tractaments staziunars – ch'èn vegnidas cunvegnidas tranter ils ospitals e las chasas da parturir cun las assicuranzas da persunas malsaunas u fixadas uffizialmain per l'onn 2015 – sin 55 pertschient. L'onn 2012 han ils custs per prestaziuns medicinalas staziunaras ch'il maun public ha stuì surpigliar en il Grischun importà var 180 milliuns francs. Da la part dal maun public surpiglian il chantun 90 pertschient e las vischnancas 10 pertschient. 

Contribuziun chantunala a la nova gruppa d'abitar externa da la fundaziun Scalottas
Il chantun sustegna in engrondiment dal center da cumpetenza per umans cun impediments da la fundaziun Scalottas a Scharans. Per metter ina fin a la suroccupaziun dal center ch'exista permanentamain dapi l'onn 2010 duain vegnir stgaffidas otg ulteriuras plazzas d'abitar e da structuras dal di protegidas en ina gruppa d'abitar externa. Per quest intent vul la fundaziun a Scharans cumprar ina immobiglia vischina. Per la regenza è cumprovà il basegn d'engrondir la purschida da plazza. A la fundaziun Scalottas vegn garantì sin basa da la lescha d'integraziun da persunas cun impediments in import da 764 000 francs a la cumpra da l'immobiglia. La garanzia vegn dada cun la resalva che la finanziaziun restanta saja reglada. Actualmain dovran 72 persunas plazzas d'abitar e da structuras dal di protegidas da la fundaziun Scalottas. L'infrastructura existenta è vegnida concepida per tgirar 65 persunas. 
 

Da vischnancas e da regiuns 

• Lon: La revisiun parziala da la planisaziun locala, concludida da la vischnanca da Lon ils 30 d'avust 2013, vegn approvada. Cun la revisiun parziala vegnan engrondidas tranter auter las zonas d'edifizis d'abitar en ina dimensiun totala da circa 0,34 hectaras.
• Tavau: Il plan da zonas e plan general d'avertura 1:500 "Schiabach" dals 22 da settember 2013 che la vischnanca da Tavau ha concludì, vegn approvà. Il med da planisaziun cuntegna quatter cumplettaziuns da pitschna surfatscha da la zona dal center.

Contribuziuns chantunalas a differentas instituziuns 

• Associaziun grischuna da sport: Per differentas activitads survegn l'associaziun grischuna da sport ina contribuziun dal fond da sport da maximalmain 38 000 francs per l'onn 2014. Il project da l'associaziun per in emprim annuari dal sport dal Grischun vegn sustegnì supplementarmain. Per las tschintg ediziuns planisadas dals onns 2014 fin 2018 vegn concedida ina contribuziun or dal fond da sport da tut en tut maximalmain 47 000 francs. Previs è in annuari che preschenta tut il sport grischun e che porscha ina plattafurma a las uniuns ed a las federaziuns en il Grischun. Las campiunessas ed ils campiuns grischuns da tut las categorias da vegliadetgna e da tut las disciplinas duain vegnir menziunads en ina part statistica. Ultra da quai duai quest annuari tractar mintgamai in aspect istoric dal sport grischun. La finamira da l'annuari è quella d'augmentar la stima per il sport grischun e per l'uffizi d'onur sco er da documentar en in'ovra da consultaziun las prestaziuns ed ils success d'atletas e d'atlets grischuns.
• Club da skis Beverin: Per la construcziun nova da la "Clubhütte Wanna Obergmeind" vegn concedida al club da skis Beverin ina contribuziun da maximalmain 43 000 francs or dal fond da sport. La nova chasa da club duai porscher sco chasa d'arriv lieu per plazzar l'infrastructura da mesirar il temp e dal pledader durant cursas. Ella serva sco deposit da material e cuntegna – ultra d'ina pitschna cuschina – er indrizs sanitars sco er in local da video e da pausa.

Projects da vias
La regenza ha approvà ils suandants projects da vias:
- via dal Malögia: il project per curreger la via dal Malögia, traject Ponte Spino – Castasegna, vegn approvà cun in pèr cundiziuns e permissiuns spezialas. La via dal Malögia H3b è in'axa da traffic impurtanta tranter Silvaplauna e Castasegna. Pervia da l'augment da la chargia da traffic demussa ella en il traject Ponte Spino – Castasegna donns vi da la cuvrida. Il profil traversal da la via existenta cun ina ladezza da 5,50 fin 6,00 meters na correspunda betg pli a las pretensiuns a la segirezza dal traffic. Il traject Ponte Spino – Castasegna è l'ultim traject tranter Casaccia e Castasegna che n'è anc betg vegnì adattà al profil traversal regular da l'uffizi da construcziun bassa.

Ultra da quai ha la regenza approvà 5,736 milliuns francs per lavurs da construcziun sin ils suandants trajects:
- via sursilvana: lavurs d'impressari, punt Val Lumpegna
- via da Carasole / a la via taliana, Roveredo – Beffen – Carasole: lavurs d'impressari, Ponti Val de Sott / Sora 
 

Gremi: regenza
Funtauna: rg chanzlia chantunala dal Grischun