Il departament da giustia, segirezza e sanadad ha fixà sias ideas en in model directiv che descriva, co che las structuras dal provediment da la sanadad dal chantun Grischun ston vegnir concepidas per ch'il Grischun disponia er en l'avegnir d'in sistem da sanadad che resguarda tut las regiuns e ch'è economicamain supportabel. In nov film da la chanzlia chantunala mussa tge pass ch'èn previs per realisar il model directiv. 

En il model directiv concernent il provediment da la sanadad en il chantun Grischun ch'è vegnì preschentà il november 2013 parta il departament da giustia, segirezza e sanadad dal fatg ch'il sistem da provediment actual cun ospitals regiunals vegnia mantegnì er en l'avegnir pervia da las relaziuns topograficas dal Grischun. Il model directiv preschenta co ch'ils ospitals regiunals, las chasas da persunas attempadas e da tgira sco er ils servetschs da la spitex possian tegnair quint er en il futur da las pretensiuns economicas e qualitativas che creschan ad in crescher. Il departament da giustia, segirezza e sanadad postulescha en il model directiv d'ina vart la creaziun da regiuns da sanadad congruentas e da l'autra vart l'adempliment da tut las prestaziuns medicinalas e da tgira en la regiun da sanadad respectiva tras in center da sanadad che cumpiglia tut ils furniturs da prestaziuns instituziunals.

En il model directiv vegni er renvià a l'impurtanza speziala d'ina stretga collavuraziun dals ospitals regiunals cun l'ospital chantunal dal Grischun. Mo in Grischun cun ina ferma plazza d'ospitals è en cas da garantir a la populaziun sco er als giasts da vacanzas er en l'avegnir in vast provediment medicinal che correspunda al progress sin il champ da la medischina. 

Remartga:
Davart quest tema stat a disposiziun in video sut www.gr.ch. En quest video prendan il schef dal departament da giustia, segirezza e sanadad, cusseglier guvernativ Christian Rathgeb, il manader da l'uffizi da sanadad sco er la direcziun dal center da sanadad Val Müstair posiziun davart l'impurtanza da stgaffir regiuns da sanadad. 
 

Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad dal Grischun, tel. 081 257 25 01, e-mail Christian.Rathgeb@djsg.gr.ch  
- dr. Rudolf Leuthold, manader da l'uffizi da sanadad, tel. 081 257 26 41, e-mail Rudolf.Leuthold@san.gr.ch  


Gremi: departament da giustia, segirezza e sanadad
Funtauna: rg departament da giustia, segirezza e sanadad