La regenza grischuna s'engascha en la conferenza da las regenzas chantunalas, per che l'iniziativa federala dal pievel "Cunter l'immigraziun da massa" vegnia realisada en ina moda ch'è supportabla per las regiuns da muntogna. Uschia tegna ella er quint dals quitads da l'Engiadina e dal Grischun dal sid. Plinavant ha la regenza concedì differentas contribuziuns, ed ella ha fixà la repartiziun dals daners da cultura supplementars ch'eran vegnids concludids dal cussegl grond per l'onn 2014.

Suenter l'acceptaziun da l'iniziativa dal pievel "Cunter l'immigraziun da massa": Il chantun s'engascha en la CdC
La regenza ha prendì enconuschientscha dals quitads da las presidentas e dals presidents communals da l'Engiadina e dal Grischun dal sid suenter l'acceptaziun da l'iniziativa dal pievel "Cunter l'immigraziun da massa". En ina brev a la regenza sco er a la commembra ed als commembers grischuns da l'assamblea federala plenara han els exprimì lur quità che cunzunt las regiuns perifericas e da cunfin sajan pertutgadas d'ina restricziun futura da la libra circulaziun da persunas.
Sco quai che la regenza scriva en sia resposta a la brev, è ella conscienta da la muntada da l'iniziativa e da las consequenzas gravantas pussaivlas per la Svizra e per il chantun Grischun. Correspundentamain vegn la regenza a s'engaschar – en il rom da sias pussaivladads – energicamain per ils basegns dal chantun. Per quest intent vegn ella a s'engaschar en emprima lingia en la conferenza da las regenzas chantunalas (CdC), nua ch'ella è represchentada cun la cussegliera guvernativa Barbara Janom Steiner en il comité directiv. A la radunanza plenara da la CdC dals 21 da mars 2014 sa laschan las regenzas chantunalas infurmar directamain dal cussegl federal per lura sa fatschentar da la chaussa.


Da vischnancas e da regiuns

• Bravuogn: La revisiun parziala da la planisaziun locala, concludida da la vischnanca da Bravuogn ils 31 d'october 2013, vegn approvada. Tras questa revisiun parziala vegn stgaffida en la planisaziun d'utilisaziun la premissa per realisar abitaziuns per il persunal da l'hotel Kurhaus Bravuogn e per mantegnair il manaschi da l'hotel a lunga vista.
• Cuira: La revisiun parziala da la constituziun da la citad da Cuira dals 9 da favrer 2014 vegn approvada. Tras questa revisiun parziala vegn il cussegl da scola – sco autoritad da direcziun strategica e da surveglianza da la scola da la citad – remplazzà tras ina cumissiun da furmaziun.
• Guarda, Lavin, Susch: Las revisiuns parzialas da las leschas da taglia da las vischnancas da Guarda, Lavin e Susch vegnan approvadas. Las disposiziuns midadas pertutgan il subject da taglia tar la taglia sin successiun d'ierta e sin donaziuns.
• Beiva: Il "plan da las zonas da protecziun da l'aua sutterrana per la funtauna ospizi dal Güglia" ed il "reglament per las zonas da protecziun per la tschiffada d'aua da funtauna La Veduta, ospizi dal Güglia" da la vischnanca da Beiva vegnan approvads.
• Mantogna sura: La revisiun parziala dals statuts dal consorzi da scola da la Mantogna sura vegn approvada. Tranter auter èn vegnidas midadas las disposiziuns davart las incumbensas e las cumpetenzas dal cussegl da scola sco er davart la repartiziun dals custs.
• Schons: La revisiun parziala dals statuts dal consorzi da scola da Schons vegn approvada. Il motiv principal per la revisiun parziala è stà l'integraziun da la scolina en il consorzi. Questa integraziun è vegnida concludida per l'onn da scola 2014/15.
• Bever, La Punt-Chamues-ch: La lescha da taglia dal cumin-baselgia evangelic refurmà Las Agnas (fusiun dals cumins-baselgia da Bever e da La Punt-Chamues-ch) dals 20 da zercladur 2012 vegn approvada.

Contribuziuns chantunalas a differentas instituziuns  

• Concedì ils daners da cultura supplementars per l'onn 2014: La regenza ha decidì co ch'ils daners da cultura supplementars, ch'il cussegl grond ha mess a disposiziun a chaschun da l'ultima sessiun da december per l'onn 2014, duain vegnir impundids. Ils meds finanzials supplementars da tut en tut in mez milliun francs, ch'èn vegnids concedids en il preventiv per l'onn 2014, vegnan repartids sco suonda:   

  Teater Cuira		120 000	francs
  Filarmonia da chombra dal Grischun		86 000	francs
  Archiv grischun per la cultura da las dunnas		24 000	francs
  Fundaziun NAIRS Scuol		30 000	francs
  Origen Festival Cultural		200 000	francs
  Opera Viva Sursaissa		40 000	francs

• Contribuziuns a differents orchesters: La regenza ha attribuì a differents orchesters las contribuziuns da 374 000 francs ch'eran vegnidas approvadas en il preventiv 2014. Per l'onn current survegn la Filarmonia da chombra 322 000 francs (fin ussa 250 000 francs), l'ensemble ö! 40 000 francs (fin ussa 30 000 francs) e l'orchester le phénix 12 000 francs (fin ussa nagina contribuziun). L'Orchestra della Svizzera italiana vegn sustegnì separadamain cun ina contribuziun annuala dad 80 000 francs or dals daners da la lottaria naziunala.
• Klibühni, Cuira: A la Klibühni a Cuira vegn concedida ina garanzia da deficit da maximalmain 200 000 francs per il program d'occurrenzas da l'onn 2014.
• Uniun Arosa cultura: A l'uniun Arosa cultura vegn concedida ina garanzia da deficit da totalmain 70 000 francs per las emnas da curs da musica e per la Music Academy che han lieu la stad/l'atun 2014.
• Academia Engiadina SA: Per il project "Turissem da furmaziun – concept e svilup da purschidas novas" vegn garantida a l'Academia Engiadina SA cun sedia a Samedan ina contribuziun da totalmain 165 000 francs en il rom da la nova politica regiunala (NPR) (mintgamai per la mesadad a quint da la confederaziun e dal chantun). Il project cumpiglia in'extensiun considerabla da las purschidas en la furmaziun professiunala supplementara per persunas creschidas, cun las qualas cunzunt persunas d'ordaifer il chantun duain vegnir acquistadas sco visitadras e visitaders dals curs. La contribuziun da sustegn gida a cuvrir ils custs da svilup e da concept sco er ad elavurar ed ad iniziar activitads da marketing resp. da vendita.
• Telefericas Tavau Claustra SA: A las Telefericas Tavau Claustra SA vegn garantida ina contribuziun chantunala da 300 000 francs en il rom dal concept per implants da sport d'impurtanza naziunala (CISIN) per construir pistas da trenament e da cursa per skis alpin Jakobshorn – Usser Isch Tavau. La confederaziun paja ina contribuziun da 700 000 francs. Tras ils implants dal CISIN duain vegnir creadas cunzunt per il cumenzament da l'enviern cundiziuns da trenament idealas per las atletas ed ils atlets da Swiss-Ski, dal center naziunal da trenament ost skis alpin e da la fundaziun Gimnasi svizzer da sport Tavau. 

Projects da vias
- Il project d'exposiziun per la correcziun da la via da la Chlus, traject sviament tunnel da la Chlus-vest, vegn approvà. Il project prevesa da meglierar in traject da colliaziun provisoric. L'uffizi federal da vias (UVIAS) vul realisar diversas mesiras per augmentar la segirezza da traffic e dals tunnels en il territori da la Chlus. Durant las lavurs vegn il traffic da la via naziunala svià sur la via da la Chlus (via veglia dal Partenz).
- Per construir in vial da bus sin la Quaderstrasse a Cuira tranter la Zeughausstrasse e la Masanserstrasse vegn garantida ina contribuziun chantunala da maximalmain 160 000 francs.

Ultra da quai ha la regenza approvà 1,156 milliuns francs per lavurs da construcziun sin il suandant traject:
- via dal Lucmagn: lavurs d'impressari en connex cun la correcziun da la via Caschlatsch – Plaun da Fravia 
 

Gremi: regenza
Funtauna: rg chanzlia chantunala dal Grischun