La conferenza da las presidentas e dals presidents dal cussegl grond recumonda al cussegl grond da resguardar la candidatura da la vischnanca d'Arosa per realisar la sessiun da zercladur 2015 en la regiun. La decisiun en chaussa prenda il cussegl grond.

En il decurs da l'enviern è la conferenza da las presidentas e dals presidents dal cussegl grond sa fatschentada cun las candidaturas per la sessiun 2015 en la regiun dal cussegl grond. Entaifer il termin èn vegnidas inoltradas duas candidaturas: ina da la vischnanca d'Arosa (cun sustegn d'Arosa turissem) e l'autra da la vischnanca da Flem (cun sustegn da Flem Laax Falera Meetings). Persvadì ha il dossier ch'è vegnì inoltrà da la vischnanca d'Arosa. Per l'ina arriva la vischnanca d'Arosa d'ademplir tut las pretensiuns ch'èn vegnidas fatgas al lieu d'organisaziun, per l'autra tegna il concept fitg bain quint d'ina sessiun en la regiun (integraziun da la populaziun). Schebain che la vischnanca da Flem ha er inoltrà ina buna candidatura, ha la conferenza da las presidentas e dals presidents chattà ch'il "pachet integral" da la vischnanca d'Arosa correspundia il meglier a l'idea d'ina sessiun en la regiun dal cussegl grond. Resguardà è er vegnì il fatg ch'en il Scanvetg n'ha anc mai gì lieu ina sessiun en la regiun.

Il cussegl grond vegn a decider definitivamain la sessiun d'avrigl 2014 davart la surdada da la sessiun en la regiun dal zercladur 2015. 
 

Infurmaziuns:
president dal cussegl grond Hans Peter Michel, tel. 079 798 20 52
 

Gremi: conferenza da las presidentas e dals presidents dal cussegl grond
Funtauna: rg conferenza da las presidentas e dals presidents dal cussegl grond