La confederaziun ed ils chantuns duain coordinar cuminaivlamain la politica da scola auta. Per far quai duain ils chantuns sa participar a la cunvegna interchantunala davart il sectur da las scolas autas svizras. La regenza suttametta al cussegl grond la missiva ed il sboz per ina participaziun dal chantun Grischun a questa cunvegna interchantunala.

L'onn 2006 ha il pievel svizzer approvà in nov artitgel davart las scolas autas per la constituziun federala (art. 63a Cst.) ensemen cun auters artitgels da furmaziun. Cun quel han las votantas ed ils votants incumbensà la confederaziun ed ils chantuns tranter auter da procurar cuminaivlamain per la coordinaziun e per la garanzia da la qualitad dals fatgs da las scolas autas da la Svizra. Per pudair far quai ston tuttas duas varts stgaffir novas basas legalas. La confederaziun ha gia relaschà ina lescha correspundenta. Per ils chantuns datti en quest connex ina cunvegna interchantunala davart il sectur da las scolas autas svizras (concordat da scola auta). Sa basond sin quella pon la confederaziun ed ils chantuns far ina "cunvegna da collavuraziun" per diriger cuminaivlamain la politica svizra da scola auta en l'avegnir en l'interess da tut ils chantuns e da la confederaziun. Il concordat da scola auta serva en quest connex sco basa per installar organs cuminaivels da la confederaziun e dals chantuns e per surdar a quels las cumpetenzas en il sectur da la politica da scola auta. Las scolas autas mantegnan da princip lur autonomia.

Il concordat da scola auta è in instrument impurtant per unifitgar la politica svizra da scola auta e per la rinforzar en la concurrenza internaziunala. Ultra da quai dat el al chantun la pussaivladad da prender influenza sin la politica federala da scola auta. Il cussegl grond vegn a tractar questa fatschenta en la sessiun da zercladur 2014. 
 

Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: martin.jaeger@ekud.gr.ch  
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail andrea.stadler@ekud.gr.ch 
 

Gremi: regenza
Funtauna: rg chanzlia chantunala dal Grischun