Dals 11 d'avrigl fin ils 24 da avust 2014 mussa il museum da la natira dal Grischun in'exposiziun speziala davart noss chars animalets: Cun plimas u cun squamas, cun pail curt u cun pail lung; els ans accumpognan gia dapi millennis. Els pon esser canerus u mits, confidents u timids. Nus als pavlain ed als charezzain. Els èn noss partenaris cur che nus avain peda ed en noss temp liber. Ina impressiun da l'exposiziun dat in nov video da la chanzlia chantunala dal Grischun sut www.gr.ch.

Actualmain vivan 8 milliuns umans en Svizra. Vitiers vegnan circa tants animals da cumpagnia che n'apportan betg in niz ed in retgav economic, ma che han tuttina ina gronda impurtanza economica, sociala, ecologica, emoziunala, istorica e medicinala. Ca. 500 000 chauns, 1 500 000 giats, 500 000 ruiders pitschens, 600 000 utschels da chabgia e 4 500 000 peschs d'acquarium e reptils vivan en ina stretga cuminanza cun nus umans!
Al cumenzament da l'exposiziun vegnan las visitadras ed ils visitaders confruntads cun la dumonda: Tge animal ma correspunda? Vus pudais gist tscherner sezs: En ina projecziun da fotografias vegnis Vus fotografads cun differents chauns, in grond cudesch cun inserats da giats As envida a fufragnar ed en ina chabgia d'utschels pon las visitadras ed ils visitaders sa laschar chantinar. Signalaments da differents animals da cumpagnia decleran chaussas interessantas davart il tegnair animals sco er davart ils custs, davart la durada probabla da lur vita, davart las pretensiuns e davart il caracter dals singuls animals.
Posseder in animal vul er dir ademplir incumbensas e surpigliar obligaziuns. Uschia lantschescha l'exposiziun tant dumondas giuridicas sco er temas sco malsognas e la mort, antenats selvadis e razzas dad ozendi, tratga e surtratga. Ma tge capita, sch'ils possessurs vulan u ston sa liberar dals animals? Co procedan ins correctamain, e tge na dastgan ins mai far? Er questas dumondas vegnan respundidas en l'exposiziun speziala attractiva.
L'impurtanza per l'economia publica dals animals da cumpagnia na dastga betg vegnir sutvalitada. Quai mussan films da reclama dals ultims 50 onns, inserats e placats dals ultims 100 onns e la gronda paletta da products en in negozi stilisà. Ils animals da cumpagnia promovan in'entira branscha economica e creeschan plazzas da lavur.
Ma l'exposiziun mussa er ils aspects negativs dal tegnair animals: Uschia vegnan tranter auter preschentads ils donns ch'ils animals da cumpagnia chaschunan en la natira e vi d'animals selvadis.
Emoziunalmain han ils animals da cumpagnia ina gronda impurtanza per lur possessurs. Nus als duvrain per stritgar, per charsinar e per als avair gugent e bler memia savens remplazzan els amis, in partenari u la famiglia. En l'exposiziun speziala èn pia da vesair er intgins animals vivs, dal scorpiun fin al portget da mar ed al cunigl.
L'exposiziun ch'è vegnida concepida dal Naturama da l'Argovia sa fatschenta cun tut las fassettas dal tegnair animals da cumpagnia ed intermediescha ina savida fundamentala e generala davart noss chars animalets, e quai en colur, en moda interactiva, infurmativa e surprendenta, cun maletgs e cun texts cun numerus objects e cun numerusas audiovisiuns sco er cun intgins animals vivs. Ella è qua per sa smirvegliar, per observar e per ponderar e delucidescha las varts suleglivas e las varts umbrivaunas dal tegnair animals da cumpagnia – d'adurads fin stgatschads.

In program accumpagnant attractiv cun visitas guidadas, cun referats, cun preschentaziuns e cun excursiuns davart il tema cumplettescha la nova exposiziun speziala.
Uras d'avertura: mardi fin dumengia da las 10.00 a las 17.00, glindesdi serrà.

Remartga:
Il video davart l'exposiziun stat a disposiziun sut www.gr.ch.


Infurmaziuns:
- Ueli Rehsteiner, directur dal museum da la natira dal Grischun, Tel. 081 257 28 43
- Flurin Camenisch, pedagog da museum, Tel. 081 257 28 45


Gremi: museum da la natira
Funtauna: rg museum da la natira