La regenza grischuna beneventa la creaziun da gruppas d'acziun mobilas tar la polizia chantunala dal Grischun ed in augment correspundent dal corp da polizia per 10 plazzas. Ultra da quai ha ella tractà differentas fatschentas da vischnancas e da regiuns sco er deliberà totalmain var 23 milliuns francs per lavurs da construcziun da vias. 

La regenza vul augmentar il corp da polizia
Il corp da la polizia chantunala dal Grischun duai vegnir augmentà. La regenza renconuscha il basegn da la polizia chantunala d'avair 10 plazzas supplementaras per furmar gruppas d'acziun mobilas per cumbatter la criminalitad e per rinforzar acziuns sistematicas da la polizia criminala e da la polizia da segirezza. Las plazzas novas ston vegnir permessas dal cussegl grond en il rom dal preventiv 2015. Tschintg dad ellas duain vegnir stgaffidas l'onn 2015 e las autras tschintg l'onn 2016. Las gruppas d'acziun mobilas duain pudair agir en moda flexibla ed independentamain dal mintgadi da la polizia sin tut il territori chantunal. Cun l'effectiv da persunal actual po la polizia chantunala dal Grischun ademplir incumbensas principalas mo gist en moda cuntentaivla. Las gruppas d'acziun mobilas novas pussibiliteschan acziuns spezialas spontanas e sistematicas. Uschia po l'augment dal turissem criminal vegnir cumbattì efficaziamain. 

Reducì la tariffa da contribuziun da la cassa chantunala da cumpensaziun per famiglias
Patrunas e patruns sco er persunas cun activitad da gudogn independenta ch'èn associads a la cassa chantunala da cumpensaziun per famiglias ston en il futur contribuir main als supplements da famiglia. La regenza ha reducì la tariffa da contribuziun per finanziar ils supplements da famiglia per 0,25 pertschient ad 1,65 pertschient da las entradas ch'èn suttamessas a la contribuziun a la AVS. Per finanziar las prestaziuns dals supplements da famiglia pajan patrunas e patruns sco er persunas cun activitad da gudogn independenta actualmain ina tariffa da contribuziun dad 1,9 pertschient da las entradas ch'èn suttamessas a la contribuziun a la AVS, e quai fin ad in import maximal da 126 000 francs. La tariffa da contribuziun reducida vala a partir dal 1. da schaner 2015. Ina revisiun parziala correspundenta da las disposiziuns executivas tar la lescha davart ils supplements da famiglia vegn messa en vigur per quel termin. Questa reducziun po vegnir fatga pervia da gronds surplis dal quint da gestiun e pervia da grondas reservas tar la cassa chantunala da cumpensaziun per famiglias. Il motiv per quai è che bler main persunas cun activitad da gudogn independenta ordaifer l'agricultura han profità dapi l'onn 2013 dals supplements da famiglia. En blers cas vegnan ils supplements da famiglia gia retratgs sur l'activitad da gudogn dependenta dal partenari da vita. 
 

Da vischnancas e da regiuns 

• Andeer: La revisiun parziala da la planisaziun locala, concludida da la vischnanca dad Andeer ils 25 d'october 2013, vegn approvada. Cun la revisiun da la planisaziun locala vegnan engrondidas las zonas da mastergn en il territoris "Runcs" e "Zups" per totalmain circa 2 hectaras (16 507 meters quadrat en il territori "Runcs", 3899 meters quadrat en il territori "Zups"). Ina part da la nova zona da mastergn "Runcs" è ina surfatscha supplementara da circa 6764 meters quadrat da l'implant da gera dad Andeer per explotar gera durant 5 onns.
• Churwalden: La revisiun parziala da la planisaziun locala, concludida da la vischnanca da Churwalden ils 27 da settember ed ils 2 d'october 2012, vegn approvada cun resalvas en quai che reguarda la zona centrala "Portal". Il concept general "Portal Churwalden" elavurà da la vischnanca serva a l'avertura dal territori da skis Lai – Arosa collià da nov.
• Glion: La revisiun parziala da la planisaziun locala dals 29 da november 2013, concludida da la vischnanca da Pigniu (dapi il 1. da schaner 2014 vischnanca da Glion), vegn approvada. Cun la revisiun parziala èn vegnidas elavuradas en spezial las zonas da privel.
• Glion: La midada dal plan da zonas 1:2000 "Curschetta", concludida da la vischnanca da Sevgein (dapi il 1. da schaner 2014 vischnanca da Glion) ils 12 da december 2013, vegn approvada. Cun la midada vegn ina part da la parcella nr. 396 attribuida da la zona d'agricultura a la zona da mastergn agronom.
• Vaz: La revisiun parziala da la lescha da construcziun, concludida da la vischnanca da Vaz ils 24 da november 2013 vegn approvada. Cun adattar la disposiziun da la lescha da construcziun concernent la zona turistica duai pudair vegnir realisà a Canols in edifizi cumpensatoric per abitaziuns per il persunal.
• Casti-Vargistagn: Als custs supplementars subvenziunabels da la 1. etappa da la meglieraziun generala da Casti-Vargistagn vegn garantida ina contribuziun chantunala da maximalmain 26 024 francs.
• Bregaglia: Per lavurs da restauraziun vi da la baselgia evangelica San Lorenzo en la vischnanca da Bregaglia vegn garantida ina contribuziun da maximalmain 149 200 francs en il rom da la tgira da monuments. La confederaziun sa participescha cun il medem import.
• Schiers: Il project per construir rempars per il Cavellbach en la vischnanca da Schiers vegn approvà. Concedida vegn ina contribuziun chantunala da maximalmain 70 400 francs. Cun il project vegnan reparads donns vi dals rempars da torrent. Ultra da quai vegn allontanada la glera da memia or dal letg da l'aual.
• Sufers: A la vischnanca da Sufers vegn garantida ina contribuziun da 173 862 francs per construir in conduct da pressiun per trair a niz l'energia da l'aua da baiver. A la contribuziun chantunala sto la vischnanca pajar ina contribuziun da 13 pertschient. La garanzia da la contribuziun chantunala premetta ina subvenziun correspundenta da la confederaziun.

Projects da vias
La regenza ha approvà 22,947 milliuns francs per lavurs da construcziun sin ils suandants trajects:
- via naziunala Partenz: montascha da ventilaturs radials, sviament da Küblis
- via d'Ascharina: lavurs d'impressari e lavurs da cuvrida, reparaziun da la punt dal Schanielabach, Platz
- via d'Avras: lavurs d'impressari en il vitg da Juf
- via dal Bernina: lavurs da cuvrida, Palü Granda – La Rösa
- via da Calanca: lavurs d'impressari, Grono – Pianecc
- via taliana: lavurs d'impressari, Anzone – Mesocco Nord
- via taliana: lavurs d'impressari, Viganaia – Malabarba
- via da la Lumnezia: lavurs da cuvrida, St. Martin – Quadra
- via dal Lucmagn: lavurs da cuvrida, traject Stgegia
- via sursilvana: lavurs da cuvrida, correcziun da la via, Lumneins
- via sursilvana: lavurs d'impressari, correcziun da la via, Rabius – Sumvitg
- via dal pass dal Fuorn: lavurs da cuvrida, traject Fuldera – Furom
- via dal pass dal Fuorn: lavurs d'impressari, correcziun da la via, Zernez – Ova dal Sagl
- via da Pardomat: lavurs d'impressari, traject Acla – Madernal
- via sursilvana da la vart dretga dal Rain: lavurs d'impressari, punt da la chavorgia da Versomi – Chera
- via dal pass dal Spleia: lavurs d'impressari, spartavias sutgera – Schwarzhütte
- via da Stierva: lavurs d'impressari, Val Mulegn – Stierva
- via da Tschiertschen: lavurs d'impressari, correcziun da la via, Ricaldei
- via d'Überlandquart: lavurs d'impressari e da cuvrida, Überlandquart – Nigglihus

Ultra da quai ha la regenza approvà in project da la vischnanca da Lumnezia per construir ina fermada da l'auto da posta a la via da Val S. Pieder. I vegn garantida ina contribuziun da 140 000 francs.


Gremi: regenza
Funtauna: rg chanzlia chantunala dal Grischun