Il cussegl turistic dal Grischun, ch'è vegnì elegì il cumenzament da l'onn, ha gì dacurt sia emprima radunanza. A chaschun da questa scuntrada èn vegnids discutads differents temas strategics e diversas ideas che duain purtar vinavant il sistem general dal turissem grischun. Per quest intent èn acturs dal turissem grischun vegnids envidads ad in dialog. Durant ils proxims 8 onns ha il chantun a disposiziun 21 milliuns francs per promover projects innovativs.

Sco organ directiv strategic dal program da turissem dal Grischun 2014–2021 procura il cussegl turistic dal Grischun per ina perspectiva externa creativa e critica. Sin la glista da tractandas da l'emprima radunanza è stada la localisaziun da schanzas e da sfidas en il turissem grischun. En quest connex sa tracti da temas sco la direcziun en il turissem (leadership), il svilup da products/dal martgà, l'innovaziun da products/dal sistem ed il management da savida sco er il svilup da l'economia locala en las regiuns turisticas. Las commembras ed ils commembers dal cussegl turistic dal Grischun han pudì far in maletg co ch'ins po promover innovaziuns en il turissem grischun e co ch'il cussegl turistic po metter impuls per innovaziuns.

Il barat activ e regular tranter il cussegl turistic ed ils represchentants da las destinaziuns e da las branschas è impurtant. Per quest intent ha il cussegl turistic envidà – il segund di da sia radunanza – persunalitads da la branscha turistica grischuna al "1. dialog strategic". Cun questa chaschun èsi vegnì discutà davart ideas da projects e davart iniziativas actualas per il turissem grischun. Quests dialogs strategics han la finamira ch'i dettia in barat tranter il plaun strategic ed operativ per gidar a realisar ideas e per uschia laschar resortir projects concrets. D'ina impurtanza centrala è en quest connex ina focussaziun consequenta sin projects innovativs ch'èn cumpetitivs sin plaun internaziunal e ch'èn concepids tenor princips d'interpresa. La discussiun ha tranter auter mussà ch'igl è impurtant da sa focussar cun cleras intenziuns sin ils basegns da la clientella e sin nischas tematicas tar la concepziun dals products e da las purschidas. 

Las basas dal program èn prontas
Sco post da coordinaziun dal program da turissem dal Grischun 2014–2021 ha l'uffizi per economia e turissem elavurà differentas basas per il program. Il departament cumpetent, numnadamain il departament d'economia publica e fatgs socials, ha plinavant definì ils criteris per conceder contribuziuns da promoziun en il rom dal program da turissem dal Grischun 2014–2021, ed el vegn a relaschar ina directiva concernent la promoziun. Suenter èn ils acturs turistics envidads d'inoltrar dumondas da projects concrets. Talas dumondas pon vegnir fatgas per projects che s'accordan cun in dals sis champs tematics dal program da turissem dal Grischun 2014–2021 e che gidan a cuntanscher las finamiras dal program. Ils projects duain en spezial effectuar ils avantatgs dal sistem e promover las cooperaziuns tranter ils acturs. Els ston gidar a rinforzar il sistem turistic general dal Grischun ed esser accordads cun la direcziun strategica da la destinaziun turistica (sco spazi economic funcziunal). Ils projects promovids ston avair in tschert cuntegn innovativ, q.v.d. metter en moviment u accelerar novas ideas ed innovaziuns.

Ils documents da basa publitgads fin ussa pon vegnir consultads per tudestg sin la pagina d'internet www.awt.gr.ch sut la rubrica "Themen/Projekte", "Tourismusprogramm Graubünden 2014–2021". Ulteriuras actualisaziuns suondan. 

Partenza dal program
In program da promoziun da plirs onns po vegnir realisà cun success mo cun la participaziun ed en stretga collavuraziun cun las autoritads politicas (vischnancas, regiuns) e cun ils circuls turistics (organisaziuns turisticas, acturs). Igl è in giavisch dal cussegl turistic che las persunas responsablas en il turissem ed en las regiuns sajan infurmadas bain davart ils cuntegns dal program e davart la promoziun da projects. Per quest motiv ha lieu la fin da zercladur 2014 a Cuira in'occurrenza d'infurmaziun, nua ch'il program da turissem vegn preschentà a la branscha. 
 

Cussegl turistic dal Grischun 

• prof. dr. Ernst A. Brugger, president dal cussegl turistic, Turitg
• Martin Candrian, president dal cussegl d'administraziun da Candrian Catering SA, Turitg
• Dania Gerhardt, head operations dad Amazee Labs, commembra dal cussegl d'administraziun e confundatura dad Amazee Labs e dad Amazee Metrics, Turitg
• Marcel Friberg, president da Grischun vacanzas, Breil
• Jeannine Pilloud, direcziun dal concern da las Viafiers federalas, manadra dal traffic da persunas, Berna
• Rolf Schafroth, KUONI Group Travel Services, vicepresident executiv, CEO da la divisiun Global Travel Services
• Jürg Schmid, directur da Svizra turissem, Turitg
• Hansjörg Trachsel, cusseglier guvernativ, departament d'economia publica e fatgs socials, Cuira
• Alois Zwinggi, managing director dal Forum economic mundial, Cologny (Genevra)

Infurmaziuns:
- prof. dr. Ernst A. Brugger, president dal cussegl turistic dal Grischun, tel. 044 299 95 95, e-mail Ernst.Brugger@bruggerconsulting.ch
- Eugen Arpagaus, manader da l'uffizi per economia e turissem, tel. 079 256 93 94, e-mail Eugen.Arpagaus@awt.gr.ch


Gremi: uffizi per economia e turissem
Funtauna: rg uffizi per economia e turissem