La regenza grischuna ha surdà l'incumbensa da far ina concurrenza per construir in nov alloschi d'asil sin l'areal dal chantun al Meiersboden. Plinavant ha la regenza fixà las indemnisaziuns e las contribuziuns d'investiziun en il traffic public. 

Planisà in nov alloschi d'asil al Meiersboden
Il chantun ha l'intenziun da construir in nov alloschi d'asil al Meiersboden sin territori communal da Churwalden. Planisà è in center per l'emprima registraziun en proprietad dal chantun che duai remplazzar il center per l'emprima registraziun Foral a Cuira. Quel sa cumpona da dus edifizis prendids en locaziun. In lieu substitutiv è urgent en vista al fatg ch'ils contracts da locaziun scadan il pli tard il settember 2017.
Al Meiersboden posseda e maina il chantun il center d'instrucziun da protecziun civila. L'areal dal chantun è grond avunda per construir sin quel anc in center per l'emprima registraziun da 180 persunas. I vegn fatg quint cun custs da circa 7,5 milliuns francs. Previsa è ina moda da construcziun cun moduls u cun elements da lain. La regenza ha surdà a l'uffizi chantunal da construcziun auta l'incumbensa d'organisar ina concurrenza per prestaziuns globalas. Il cussegl grond vegn a tractar questa fatschenta l'onn 2015. Il nov center per l'emprima registraziun duai vegnir avert il zercladur 2017. 

Fixà las contribuziuns per il traffic public
La regenza grischuna ha fixà las contribuziuns chantunalas 2014 per las interpresas ch'èn activas en il traffic public regiunal. Tut en tut importan las contribuziuns chantunalas en las duas spartas "traffic" ed "infrastructura" circa 70 milliuns francs.
A favur da l'infrastructura da la Viafier retica (VR) pajan la confederaziun ed il chantun contribuziuns da var 165 milliuns francs. Las indemnisaziuns per il traffic da persunas e da rauba da la VR importan totalmain var 77 milliuns francs. Ils meds finanzials chantunals necessaris èn cuntegnids en il preventiv 2014. 

Nov project per mesirar la qualitad da la legiferaziun chantunala
Cun in nov project vul il chantun Grischun survegnir indicaziuns fidadas davart la qualitad da sia legiferaziun. La finamira è d'avair ina basa da datas segirada che permetta da trair conclusiuns davart il svilup quantitativ e qualitativ da la legiferaziun en il chantun Grischun. La regenza ha acceptà il project ed ha incumbensà la chanzlia chantunala da realisar quel. Il project vegn realisà en collavuraziun cun ina gruppa interdisciplinara d'expertas e d'experts sut la direcziun da l'universitad da Turitg. En in'emprima fasa vegnan rimnadas e valitadas las datas davart la dimensiun e davart l'activitad da las regulaziuns dal chantun. Sa basond sin questa analisa da la situaziun duain – en ina segunda fasa – vegnir fatgs scleriments pli profunds davart tschertas dumondas. La mesiraziun da la qualitad da legiferaziun po manar a glisch impurtantas enconuschientschas praticas che servan a la futura legislaziun. 

Consultaziun tar l'ordinaziun davart il cataster dals conducts
La lescha chantunala da geoinfurmaziun oblighescha las vischnancas da nov da manar in cataster dals conducts. Il cataster inditgescha la situaziun geografica dals conducts permanents sin il territori communal. Cun la nova ordinaziun duai vegnir reglà co manar e duvrar ils catasters communals dals conducts. Perquai che las disposiziuns pertutgan – ultra da las vischnancas – er bleras proprietarias e blers proprietaris d'ovras, ha la regenza deliberà in sboz da l'ordinaziun per la consultaziun fin ils 22 d’avust 2014. Ils documents pon vegnir consultads sut www.gr.ch / Rumantsch / Consultaziuns currentas. 

Sustegn finanzial per renovar mirs sitgs
La regenza ha approvà ina dumonda collectiva per renovar mirs sitgs en differentas vischnancas dal chantun. En las vischnancas da Brusio, Claustra-Serneus, Donat, Guarda, Lavin, Lumnezia, Luzein, Puschlav, Sent, Val Müstair e Val S. Pieder duain quest onn vegnir reparads mirs sitgs d'ina lunghezza totala da 1612 meters. Per l'execuziun da las lavurs vegn concedida ina contribuziun chantunala or dal fond da la lottaria naziunala d'in import da maximalmain 163 500 francs. Latiers vegn ina contribuziun federala dal medem import. 

Nova incarica da prestaziun per scolar ils uffants co mantegnair dents sauns
Cun la Societad grischuna da dentists sco er cun la citad da Cuira vegnan concludidas novas incaricas da prestaziun davart prender mesiras per mantegnair dentadiras saunas en las scolas dal chantun Grischun. En las classas da las scolinas e da las scolas primaras grischunas vegnan dadas mintga onn da scola lecziuns spezialas che servan a mantegnair dentadiras saunas. Las prestaziuns da la Societad grischuna da dentists sco er da la citad da Cuira vegnan indemnisadas en total cun in import pauschal da 162 800 francs per onn (enfin ussa 120 000 francs). 
 

Da vischnancas e da regiuns

• Claustra-Serneus: La revisiun parziala da la planisaziun locala, concludida da la vischnanca da Claustra-Serneus ils 9 da favrer 2014, vegn approvada. Cun la revisiun parziala vegn determinada ina zona per il sport da chavals sin la parcella nr. 1574 en il territori "Im Tal".
• Regiun Bregaglia: Il plan directiv regiunal "Concetto territoriale regionale", ch'è vegnì concludì da la corporaziun regiunala Comune di Bregaglia ils 10 da schaner 2013, vegn approvà e vegn declerà sco liant per las autoritads dal chantun Grischun. La vischnanca da Bregaglia ha collecziunà ils divers documents dal plan directiv da la corporaziun regiunala en in plan directiv cumplessiv survesaivel. En quest connex èn ils cuntegns dal plan directiv vegnids actualisads e cumplettads en divers secturs tematics.

Contribuziuns chantunalas a differentas instituziuns 

• Claustra da Mustér: A la claustra da Mustér vegn concedì in emprest da la confederaziun dad 1,2 milliuns francs en il rom da la nova politica regiunala (NPR) per cumplettar la claustra per in diever turistic. Quai cun la resalva che la finanziaziun totala saja reglada. Sco prestaziun d'equivalenza a l'emprest da la NPR vegn garantida ina contribuziun chantunala da 278 607 francs a favur da quest project. Resalvada resta la concessiun dals credits necessaris tras il cussegl grond. Cun il project vul la claustra da Mustér crear la basa per metter a disposiziun offertas per in turissem da di e da seminari. Tranter auter vegnan construidas novas chombras da giasts e novs locals da seminari. Plinavant èsi previs d'avrir il plaunterren e d'endrizzar ina cafetaria.

Projects da vias 

• Via da Breil, punt nova sur il Rain anteriur a Danis: Il project d'exposiziun per la nova trassaziun da la via da Breil, construcziun da la punt nova sur il Rain anteriur a Danis, vegn approvà. Tras quest project po vegnir garantida ina colliaziun moderna dals abitadis per lung da la via da Breil, ed in provisori per camiuns grevs po vegnir abolì. La via da Breil cumenza a Tavanasa e va sur la punt dal Rain anteriur, che ha ina lunghezza da ca. 90 m, vi Danis (Sur Punt) e cuntinuescha da là en direcziun da Breil. La punt sur il Rain anteriur a Danis è antiquada e na correspunda betg pli a las pretensiuns dal volumen da traffic d'ozendi. Il project prevesa da construir ina punt nova circa 100 meters pli ensi.
• Via d'Engiadina, Zernez: Il project d'exposiziun per la correcziun da la via d'Engiadina, traject Val Raschitsch – Zernez, vegn approvà. La via vegn schlargiada sin ina lunghezza da ca. 1075 meters.
• Via taliana, Grono: Il project d'execuziun per construir in passape, ina insla da segirtad sco er ina fermada dal traffic public per lung da la via taliana entaifer il vitg da Grono vegn approvà. I vegn garantida ina contribuziun chantunala da maximalmain 127 000 francs.
• Via da Val Stussavgia, Tenna – Egschi: Il project d'exposiziun per la correcziun da la via da Val Stussavgia, traject Tenna – Egschi, vegn approvà. La via existenta vegn schlargiada sin ina lunghezza da ca. 980 meters. La spunda cun ina ferma pendenza pretenda da construir sis punts a spunda e divers mirs.

Ultra da quai ha la regenza approvà 946 000 francs per lavurs da construcziun sin il suandant traject:
- via dal Güglia: lavurs da cuvrida La Veduta – Alp Güglia 
 

Gremi: regenza
Funtauna: rg chanzlia chantunala dal Grischun