Igl è dischagreabel per las participantas ed ils participants dal traffic, ma necessari per il mantegniment da la rait da vias chantunalas: Er l'onn 2014 vegnan realisadas sin las vias dal Grischun differentas lavurs da renovaziun e da mantegniment che chaschunan impediments dal traffic sin via. Sin www.gr.ch dat in nov film da la chanzlia chantunala dal Grischun ina survista davart ils gronds plazzals en il chantun.
Ina gronda part da nossa rait da vias è vegnida construida anc durant l'emprima mesadad da l'ultim tschientaner. Pervia dal ferm augment dal volumen da traffic en ils ultims decennis èn creschids correspundentamain la lavur ed ils custs per garantir la segirezza e per mantegnair la qualitad da las vias.
Deplorablamain chaschunan questas lavurs savens tscherts impediments da la circulaziun. L'uffizi da construcziun bassa fa dentant attenziun – là nua ch'igl è pussaivel – ch'ils plazzals vegnian rumids e ch'i stettian a disposiziun dus vials al traffic la stad durant la stagiun auta. La stagiun da construcziun da mo 8 mais ch'è gia fitg curta pervia da las relaziuns climaticas vegn savens anc restrenschida tras mal'aura. Uschia na pon las lavurs da construcziun betg adina vegnir realisadas entaifer il temp previs. Quai pretenda pazienza e toleranza da vart da las participantas e dals participants sco er da vart da las interpresas da construcziun.
La gronda part da las utilisadras e dals utilisaders da las vias mussa però chapientscha per ils impediments dal traffic pervia da plazzals. Quai resulta d'in sondagi da l'opiniun publica davart la rait da vias chantunalas. L'uffizi da construcziun bassa ha incumbensà l'atun passà l'institut per turissem e temp liber da la SATE a Cuira da far in sondagi correspundent. 1181 persunas han emplenì il questiunari en l'internet. 96 % da las participantas e dals participants abitan en il chantun Grischun. Il rapport detaglià davart quest sondagi chattais Vus sut il suandant link:
http://tools.tiefbauamt.gr.ch/pdf/tba-info-140402_umfrage-strassenbenutzer.pdf
La glista dals plazzals cun impediments dal traffic pervia da lavurs da construcziun e da mantegniment cumpiglia questa stad 126 annunzias sin la rait da vias principalas e 118 annunzias sin la rait da vias da colliaziun. Il dumber dals plazzals che chaschunan impediments dal traffic correspunda pia a la valur media da plirs onns. Il temp da construcziun e la lunghezza dal plazzal sa differenzieschan tut tenor il gener e la dimensiun da la mesira da construcziun. Ina charta interactiva dals plazzals è endrizzada sut il suandant link:
http://www.strassen.gr.ch/sites//baustelle/details.html
Remartga:
Il video davart quest tema stat a disposiziun sut
www.gr.ch.
Infurmaziuns:
- Heinz Dicht, inschigner superiur, uffizi da construcziun bassa, tel. 081 257 37 01, e-mail:
heinz.dicht@tba.gr.ch
- Peter Stirnimann, responsabel per las medias, uffizi da construcziun bassa, tel. 081 257 37 11, e-mail:
peter.stirnimann@tba.gr.ch
Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun