Ils trenaments dals GKB SPORTKIDS èn appreziads ed han success. In nov studi mussa: Nov da diesch anteriurs SPORTKIDS èn activs en in'uniun da sport u fan diever d'ina autra purschida da sport. Sonda proxima, ils 14 da zercladur 2014, vegn festivà a Maiavilla il giubileum da 10 onns cun sportistas e sportists grischuns prominents.

Ils GKB SPORTKIDS èn in program per promover il moviment e vegnan organisads da grischun sport. Lur finamira è quella da porscher als uffants da 5 e 6 onns ina scolaziun sportiva da basa. Grazia a trenaments multifars, concepids tenor las furmas da moviment da basa duain ils uffants trenar lur talents e lur abilitads motoricas ed uschia metter ina basa ideala per activitads sportivas durant l'entira vita e per ina vita sauna. Ultra dals trenaments da basa variads fan trenaments da fufragnadi en differentas uniuns localas quaida d'exercitar pli tard ina tscherta disciplina da sport. Tras quai che bleras uniuns porschan trenaments per uffants a partir da 7 onns, vegnan ils GKB SPORTKIDS chapids sco "furniturs" da las uniuns. 

In studi cumprova il success da la promoziun da la generaziun giuvna
En collavuraziun cun grischun sport ha la scola auta federala da sport a Magglingen, che tutga tar l'uffizi federal da sport, evaluà l'efficacitad dal program areguard la promoziun dal sport. In questiunari correspundent è vegnì respundì dals geniturs da passa 700 anteriuras participantas e participants che han visità tranter il settember 2005 ed il zercladur 2009 ina purschida dals GKB SPORTKIDS.
Ils resultats ils pli impurtants dal studi èn ils suandants: 

• Directamain suenter la finiziun da la purschida dals SPORTKIDS han 96 pertschient dals uffants visità ina purschida da sport cuntinuanta. Ils trenaments da fufragnadi paran da gidar ils uffants tar la tscherna da purschidas d'uniuns.
• Bunamain in quart dals geniturs consultads ha inditgà che lur uffant saja tranter auter er entrà en in'uniun da sport, perquai ch'el aveva emprendì ad enconuscher la disciplina da sport tar ils SPORTKIDS.
• Nov da diesch uffants ch'èn sa participads tranter l'onn 2005 e l'onn 2009 als SPORTKIDS, èn er oz anc activs en in'uniun da sport u fan diever d'ina autra purschida da sport. La mesadad da quests uffants exercitescha duas disciplinas da sport u dapli. Il pli savens vegnan trenads gimnastica e ballape.
• Bunamain dus terzs dals geniturs (63 pertschient) han considerà la purschida dals SPORTKIDS sco impurtanta per il svilup sportiv da lur uffant. Tut en tut han 77 pertschient dals geniturs inditgà ch'els sajan stads il pli intgantads da la multifariadad dal trenament sco er dals trenaments da fufragnadi.

Ch'ils GKB SPORTKIDS èn ina istorgia da success na mussa betg mo il studi, mabain er il fatg ch'il dumber da participantas e da participants crescha ad in crescher e ch'i èn vegnids fundads novs lieus da trenament. Actualmain treneschan stgars 600 uffants en passa 30 lieus da tut il chantun. Dapi quest onn è er Savognin da la partida. A partir dal settember 2014 vegnan purschids da nov er trenaments a Küblis/Saas ed a Landquart/Mastrils. Il concept vegn copià er en auters chantuns: Il proxim onn da scola cumenzan en il chantun Vallais sis gruppas d'uffants cun il trenament tenor l'exempel dals GKB SPORTKIDS. 

Giubileum da 10 onns cun sportistas e sportists grischuns d'elita a Maiavilla
Quest onn festiveschan ils GKB SPORTKIDS lur giubileum da 10 onns. Il final che ha lieu mintga onn a Maiavilla porscha perquai il rom per las festivitads. Sonda, ils 14 da zercladur 2014 (data da spustament ils 21 da zercladur 2014), sa scuntran ils uffants tar il stabiliment da sport Lust per absolver en gruppas in percurs da moviment multifar. Envidads al final da giubileum èn er participantas e participants da pli baud. Ellas ed els sa mesiran en ina superconcurrenza da set disciplinas cun sportistas e sportists grischuns d'elita actuals. Binia Feltscher-Beeli, Nino Niederreiter e Reto von Arx, Gino Caviezel sco er autras sportistas e sportists d'elita battan ensemen cun ils uffants per la victoria dal di. Per ina finiziun musicala animada da las festivitads da giubileum procura il chantautur grischun Linard Bardill davant il ravugl dals uffants, da las sportistas e dals sportists sco er dals geniturs. 

Program dal final da giubileum dals GKB SPORTKIDS
09.15 Cumenzament da la superconcurrenza da set disciplinas dals anteriurs GKB SPORTKIDS
10.30 Cumenzament da la cursa da posts dals GKB SPORTKIDS actuals
15.00 Grond final cun Linard Bardill
Silsuenter proclamaziun dals rangs 


Fotografia agiuntada: Fotografia dals trenaments dals GKB SPORTKIDS 
 

Infurmaziuns:
Thierry Jeanneret, manader da grischun sport, tel. 081 257 27 51, e-mail thierry.jeanneret@avs.gr.ch  


Gremi: uffizi per la scola populara ed il sport
Funtauna: rg uffizi per la scola populara ed il sport