Per tscherts implants solars sin tetgs vala da nov ina simpla procedura d'annunzia. En quest connex ha il chantun edì in mussavia.

En il rom da la revisiun da la lescha e da l'ordinaziun federala davart la planisaziun dal territori èn vegnidas schluccadas las prescripziuns da permissiun per implants solars sin tetgs. Tut tenor il lieu e la concepziun na dovran tscherts implants solars dapi il 1. da matg 2014 betg pli ina permissiun da construcziun, mabain èn mo suttamess ad in'obligaziun d'annunzia.
Il dretg chantunal davart la planisaziun dal territori enconuscha oz bain ina procedura d'annunzia. Qua sa tracti dentant d'ina procedura simplifitgada per la permissiun da construcziun. Per accordar il dretg chantunal davart la planisaziun dal territori al dretg surordinà sto ussa vegnir iniziada ina revisiun dal dretg chantunal. 
Per il temp transitoric han il departament d'economia publica e fatgs socials e l'uffizi per il svilup dal territori elavurà in mussavia sco er documents da model per far las annunzias e per confermar quellas. En il mussavia vegni explitgà, tge implants che na dovran nagina permissiun. Ultra da quai vegnan fatgas recumandaziuns per ina buna concepziun dals implants. 
Il mussavia ed ils documents da model pon vegnir retratgs gratuitamain sin la pagina d'internet da l'uffizi per il svilup dal territori (www.are.gr.ch > Rumantsch > Temas/projects > implants solars) 
 

Infurmaziuns:
Richard Atzmüller, manader da l'uffizi per il svilup dal territori, tel. 081 257 23 21, e-mail Richard.Atzmueller@are.gr.ch  
 

Gremi: uffizi per il svilup dal territori
Funtauna: rg uffizi per il svilup dal territori