La regenza suttametta al cussegl grond ina missiva davart il nov edifizi cumplementar per la mensa e per la mediateca a la scola chantunala grischuna a Cuira. Quai è l'ultima etappa da la renovaziun totala da las chasas da scola. Il parlament e las votantas ed ils votants decidan davart in credit da 27 milliuns francs.

Il program cumplessiv per sanar l'infrastructura da scola da la scola chantunala grischuna a Cuira vegn bainprest terminà: Suenter las renovaziuns da la scola chantunala Halde e da la chasa Cleric da la scola chantunala Plessur durant ils onns 2006 fin 2012 duai vegnir realisà fin l'onn 2017 anc l'edifizi cumplementar che manca anc e che cuntegna ina mensa ed ina mediateca. Il nov edifizi vegn a sa chattar en ina situaziun centrala da la scola chantunala, al Münzweg sper il bogn avert Sand. En l'edifizi vegnan ultra da quai integrads locals per la protecziun dals bains culturals per la biblioteca chantunala e per l'archiv dal stadi dal Grischun. La regenza ha deliberà ina missiva correspundenta per mauns dal cussegl grond.

Realisà vegn il project "Denys" da l'architect Andreas Senn da Son Gagl ch'è vegnì eruì a chaschun d'ina concurrenza l'onn 2011 e ch'è vegnì repassà silsuenter. Al plaunterren sa chatta la mensa cun la cuschina. La sala da mangiar dispona da passa 300 plazzas. Sch'ins presuma in'occupaziun dubla en duas etappas, correspunda quai ad ina capacitad da circa 600 pasts da mezdi. Sin il plaun sura è situada la mediateca en in grond local che po vegnir concepì en moda flexibla e che po vegnir sutdividì. La mediateca metta a disposiziun medias ch'èn relevantas per l'instrucziun (er medias electronicas). Ultra da quai è ella in lieu da scuntrada e da barat d'opiniuns. Al segund plaun sutterran sa chattan ils novs locals supplementars per la protecziun dals bains culturals da la biblioteca chantunala e da l'archiv dal stadi. Là vegn er creà spazi per tegnair en salv medias audiovisualas. Il project permetta da cuvrir in basegn impurtant da las duas instituziuns. L'entir edifizi vegn stgaudà cun chalur a distanza (dal stabiliment per arder ruments a Trimmis). 

Il nov center da la scola chantunala
Il nov edifizi cumplementar furma – tras sia situaziun – il nov center dals trais stabiliments da la scola chantunala Halde, Plessur (Cleric e tract da biologia) sco er implant da sport Sand. El vegn traversà mintga di – sulettamain cun midar stanza da scola – da tschients da scolaras e scolars. Il nov edifizi sa chatta directamain sper la stgala da colliaziun tranter las scolas Halde e Plessur. Dals conturns sensibels concernent l'architectura urbana a l'ur da la citad veglia davant la culissa da Son Luzi e da la catedrala vegni tegnì quint. Il bogn avert existent Sand da la citad da Cuira na vegn betg tangà, ma sinergias futuras na vegnan betg excludidas dal project.

Ils custs per il nov edifizi importan en total 27 milliuns francs (23,5 milliuns per la mensa e per la mediateca, 3,5 milliuns per ils locals per la protecziun dals bains culturals). Ultra da quai èsi da far quint – en cumparegliaziun cun il di dad oz – cun custs supplementars da gestiun e da persunal dad annualmain 605 000 francs. Il cussegl grond vegn a decider durant la sessiun d'october 2014 davart in credit d'impegn da 27 milliuns francs. Perquai che ses conclus è suttamess al referendum da finanzas obligatoric, è necessaria ina votaziun dal pievel. Sch'il parlament sa decida en moda positiva, è previsa questa votaziun per il mars 2015. Suenter vegnissan realisadas la planisaziun d'execuziun e la publicaziun da las lavurs da construcziun. Il cumenzament da las lavurs da construcziun è previs per l'atun 2015, la collaudaziun per la fin da l'onn 2017.

Ils custs totals da la sanaziun architectonica da la scola chantunala grischuna che dura da l'onn 2006 fin l'onn 2017 (senza ils locals per la protecziun dals bains culturals da la biblioteca chantunala e da l'archiv dal stadi) importan 109,9 milliuns francs. Mancar manca anc ina sanaziun architectonica dal convict a la Arosastrasse (planisada per l'onn 2018) sco er dals implants da sport Sand. 

Consequenza per la finanziaziun da las scolas medias
Il nov edifizi cumplementar per la mensa e per la mediateca a la scola chantunala ha ina influenza directa sin la finanziaziun da las scolas medias en il chantun. Sch'il parlament e las votantas ed ils votants beneventan il nov edifizi cumplementar, s'augmenta la pauschala d'investiziun a las scolas medias privatas. 
 

Agiuntas:
Plan da situaziun e visualisaziun dal nov edifizi cumplementar per la mensa e per la mediateca 
 

Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch  
 

Gremi: regenza
Funtauna: rg chanzlia chantunala dal Grischun