Manaschis industrials e commerzials sco er interpresas da servetsch sco hotels e telefericas dovran per part blera energia, principalmain electricitad ed energias fossilas. Tenor la lescha d'energia dal chantun Grischun pon consumentas grondas e consuments gronds vegnir obligads d'analisar lur consum d'energia e da realisar mesiras pretendiblas per optimar lur consum. A chaschun da l'apero d'energia dals 27 d'avust 2014 a la SATE a Cuira vegni mussà, co che hotels grischuns reduceschan voluntarmain lur consum.

Consumentas grondas èn interpresas che dovran mintga onn passa 500 000 uras da kilowatt electricitad u passa 500 000 liters ieli da stgaudar. En cas da l'electricitad correspunda quai al consum annual da circa 100 chasas d'ina famiglia, en cas da l'ieli da stgaudar a circa 25 camiuns-cisterna. En il chantun Grischun datti var 200 consumentas grondas e consuments gronds. Ad ellas ed els po vegnir attribuì stgars 30 pertschient dal consum d'electricitad total dal Grischun per onn. Intginas branschas èn gia oz motivadas d'augmentar lur effizienza energetica. En autras branschas n'èn las interpresas anc betg conscientas, quants daners ch'ellas dovran per l'energia e cunzunt quants daners ch'ellas pudessan spargnar. 

Augmentar l'effizienza energetica en l'hotellaria
Tar ils manaschis cun bler potenzial tutga l'hotellaria grischuna. Il cumenzament da l'onn 2013 è vegnì lantschà il project "tur da signal" da la federaziun hotelleriesuisse Grischun per augmentar l'effizienza energetica. La finamira da quest project è quella da sensibilisar e da motivar las hotelieras ed ils hoteliers per trair a niz potenzials da spargn existents. En quest connex stattan en il center oravant tut mesiras economicas che na chaschunan naginas perditas da confort. En curt temp han pudì vegnir persvadids passa 60 hotels da far cun la confederaziun ina cunvegna da finamiras voluntara per ils proxims 10 onns. Tras questa cunvegna s'obligheschan ils hotels da reducir lur consum dependentamain dal potenzial da spargn individual. Ultra dals custs d'energia pli bass pon els profitar d'ulteriurs avantatgs. A medem temp vegnan ademplidas las pretensiuns legalas envers las consumentas grondas ed ils consuments gronds.

A chaschun dal 79. apero d'energia da mesemna, ils 27 d'avust 2014, en l'aula da la scola auta da tecnica ed economia a Cuira vegn preschentà il project "tur da signal". 

Apero d'energia
Interpresas daventan effizientas areguard l'energia – l'hotellaria grischuna sco bun exempel
Data: 27 d'avust 2014
Temp: 17.00 fin 19.00, suenter apero
Lieu: aula da la scola auta da tecnica ed economia Cuira, Pulvermühlestrasse 57 e scuola professionale, 7742 Poschiavo
Entrada: 20.– francs (cassa da saira)
Annunzia: energie-apero@fh-htwchur.ch u fax 081 286 24 00 fin ils 25 d'avust 2014 
 

Infurmaziuns:
Michael Casutt, manader da project "effizienza energetica", uffizi d'energia e da traffic, tel. 081 257 36 30, e-mail Michael.Casutt@aev.gr.ch  


Gremi: uffizi d'energia e da traffic
Funtauna: rg uffizi d'energia e da traffic