Pervia dal grond dumber da requirentas e da requirents d'asil assegnads da la confederaziun èn ils centers collectivs dal Grischun occupads fermamain. Per ch'i stettian a disposiziun ils proxims mais avunda plazzas da collocaziun prenda il chantun en locaziun temporarmain da la citad da Cuira in stabiliment militar da truppas per la protecziun civila. En cas da basegn po il stabiliment vegnir utilisà previsiblamain a partir da mez october.
Ils ultims mais han ins pudì registrar in augment ferm e cuntinuà dal dumber da requirentas e da requirents d'asil assegnads da la confederaziun al chantun Grischun. Cuntrari als onns precedents sa tracti en quest cas da persunas da l'Eritrea, da la Siria e d'auters pajais cun ina gronda quota da protecziun, las qualas restan probablamain en Svizra per in temp pli lung. In ulteriur augment dal dumber da dumondas d'asil da las regiuns da crisa sco la Siria, l'Irac u l'Ucraina è probabel tenor l'avis da l'uffizi federal da migraziun. Pervia da quest svilup èn ils alloschis existents occupads fitg fermamain. Sco mesira d'urgenza ha l'uffizi da migraziun e da dretg civil (UMDC) cumpetent midà la fin da fanadur 2014 il center d'expulsiun a Valzeina ad interim en in center da transit. Ina reavertura da l'immobiglia da reserva Schiabach a Tavau Plaz è actualmain en preparaziun. Cura che questas plazzas da collocaziun èn er occupadas, mancan plazzas da reserva. L'uffizi da construcziun auta dal Grischun evaluescha actualmain cun l'UMDC ina fin duas ulteriuras immobiglias sco futurs centers chantunals da transit. Per pudair garantir la capacitad d'admissiun e da collocaziun en cas d'in dumber constant aut u creschent da dumondas d'asil è l'UMDC dentant sfurzà da collocar – sco l'ultima giada ils onns 1998 e 1999 – las persunas che vegnan assegnadas temporarmain al chantun en stabiliments da protecziun civila.
Cun il stabiliment militar da truppas per la protecziun civila Plankis en il plaun sutterran dals locals dal lavuratori da la ARGO a la Emserstrasse a Cuira ha pudì vegnir chattada ina immobiglia adattada da la citad da prender en locaziun per maximalmain 100 persunas. Il stabiliment da protecziun ch'è en proprietad da la citad da Cuira na vegn betg pli utilisada per il militar dapi intgins onns. Las abitantas ed ils abitants che vivan sper il stabiliment èn gia vegnids infurmads en preschientscha dal president da la citad da Cuira e da represchentants da l'UMDC. La citad da Cuira metta a disposiziun temporarmain al chantun il stabiliment mintgamai en cas da stretgas en connex cun la collocaziun da requirentas e requirents d'asil, en in'emprima fasa a partir dals 13 d'october 2014. Per l'assistenza da las requirentas e dals requirents d'asil e da las persunas admessas provisoricamain èn cumpetentas las collavuraturas ed ils collavuraturs da l'UMDC, las qualas vegnan sustegnidas d'appartegnents da la protecziun civila.
Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail
christian.rathgeb@djsg.gr.ch
- president da la citad Urs Marti, citad da Cuira, tel. 081 254 41 01, e-mail
urs.marti@chur.ch
- Markus Dünner, architect chantunal, uffizi da construcziun auta, tel. 081 257 36 31, e-mail
markus.duenner@hba.gr.ch
- Marcel Suter, manader da l'uffizi da migraziun e da dretg civil, tel. 081 257 25 21, e-mail
marcel.suter@afm.gr.ch
Gremi: regenza
Funtauna: rg chanzlia chantunala dal Grischun