Il tribunal federal ha confermà che la zona da planisaziun ch'era vegnida disponida da la vischnanca da Laax saja parzialmain inadmissibla. La vischnanca sto cuntinuar cun la procedura per la permissiun da construcziun concernent l'utilisaziun planisada da l'hotel Rustico sco center d'asil.

La regenza ha prendì enconuschientscha dal fatg ch'il tribunal federal è suandà sia argumentaziun en la sentenzia dals 25 d'avust 2014. Il matg 2013 aveva il chantun inoltrà a la vischnanca da Laax ina dumonda da construcziun per midar l'utilisaziun da l'hotel Rustico e per transfurmar quel en in center d'asil. Sin quai ha la suprastanza communala da Laax relaschà ina zona da planisaziun communala. Tras quella na fissi betg stà pussaivel da duvrar l'hotel sco center d'asil avant la terminaziun d'ina procedura da planisaziun da blers onns. Uschia ha la suprastanza communala sistì la dumonda da construcziun. La dretgira administrativa dal Grischun ha approvà parzialmain il recurs ch'il chantun ha fatg l'october 2013 cunter questa decisiun, ed ella ha ordinà a la vischnanca da cuntinuar cun la procedura per la permissiun da construcziun. Il tribunal federal ha ussa confermà questa sentenzia.

La regenza pretenda ussa ina tenuta constructiva da la vischnanca da Laax. En spezial pervia da la situaziun actuala acuta cun gronds dumbers da requirentas e da requirents d'asil assegnads spetga ella che la vischnanca dettia svelt la permissiun da construcziun, uschia ch'il center d'asil possia vegnir avert senza ulteriurs retards. Il cusseglier guvernativ Christian Rathgeb vegn a contactar la vischnanca da Laax. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun