Represchentantas e represchentants da las regenzas e dals parlaments dal chantun Grischun sco er da la regiun taliana Lumbardia èn sa scuntrads oz a Le Prese (Puschlav) ad in discurs da lavur. A chaschun da l'emprima scuntrada da quest gener è vegnida accentuada la buna relaziun da vischinanza. Plinavant èn vegnidas discutadas pussaivladads per collavurar en moda pli intensiva en secturs d'interess cuminaivels.

A Le Prese èn sa scuntradas oz per l'emprima giada delegaziuns da la regenza e dal parlament dal chantun Grischun e da la regiun taliana Lumbardia. La delegaziun grischuna è vegnida manada dal president dal cussegl grond Duri Campell, dal president da la regenza Mario Cavigelli e da la cussegliera guvernativa Barbara Janom Steiner. Al Lago di Poschiavo han els dastgà beneventar Raffaele Cattaneo, president dal cussegl regiunal da la Lumbardia, Mario Mantovani, vicepresident da la regiun Lumbardia, sco er auters represchentants d'aut rang.

Per tuttas duas varts è quai stà in mument signifitgant. La scuntrada ha gì l'intent da metter sin in nov livel las bunas relaziuns da vischinanza existentas. En il rom da la scuntrada n'èsi uschia betg mo stà pussaivel da discutar temas actuals, mabain er d'iniziar – tut tenor basegn – ulteriuras tractativas sin il livel d'expertas e d'experts. En il center da la scuntrada da lavur è stada la collavuraziun bilaterala en ils secturs economia, traffic, sanadad e segirezza. 

Da l'Expo Milaun fin a l'ospital da l'Engiadin'ota
Ensemen cun ils chantuns dal Gottard Tessin, Uri e Vallais vegn il Grischun ad esser giast l'onn proxim a l'Expo Milaun 2015. Igl è vegnì fixà da profitar da l'exposiziun mundiala a Milaun per examinar, quant enavant ch'igl è pussaivel d'approfundar la collavuraziun economica transcunfinala tranter il Grischun e la Lumbardia. D'in barat d'infurmaziuns sin in livel spezialisà duain profitar las interpresas da tuttas duas varts. Ina stretga collavuraziun è necessaria er, perquai ch'il dumber da cunfinarias e cunfinaris è s'augmentà fermamain. Sco project exemplaric da l'economia è vegnì menziunà il center da cumpetenza per laina Valposchiavo en la regiun da cunfin Puschlav – Sondrio.

Bunamain caracter da model pudess avair in project da la cooperaziun transcunfinala en il sectur da la sanadad: L'ospital da l'Engiadin'ota ha l'intenziun da porscher sias prestaziuns medicinalas en la regiun Lumbardia. Intgins obstachels giuridics e tariffars ston dentant anc vegnir superads. Tuttas duas varts èn sa cunvegnidas da tschertgar ina soluziun. Ina cunvegna da basa tranter la regiun Lumbardia ed il chantun Grischun pudess esser ina pussaivladad en chaussa.

Plinavant vulan ins en l'avegnir coordinar meglier ils uraris dal traffic public in cun l'auter. Quai er en vista a l'Expo Milaun 2015, per ch'ils giasts dal Grischun possian profitar da colliaziuns directas. Areguard las colonnas che resultan dal traffic d'arriv a Livigno spetga il chantun Grischun che la vart taliana prendia mesiras decididas per eliminar il problem.

Per augmentar la segirezza al cunfin è vegnida discutada l'idea da patruglias da polizia cuminaivlas. Cun patruglias cuminaivlas en il sectur da cunfin pudess vegnir augmentà il dumber dals servetschs da polizia durant las notgs. Las experientschas da la polizia chantunala dal Grischun mussan che talas acziuns han in effect decuraschant e ch'i dat uschia damain delicts. La collavuraziun da la polizia chantunala cun ils organs da segirezza da l'Italia è gia oz intensiva e funcziuna fitg bain.

Il president da la regenza Mario Cavigelli ha tratg in facit positiv da la scuntrada cun la delegaziun da la Lumbardia. A l'orientaziun da las medias che ha lura gì lieu a Le Prese ha el ditg ch'el saja persvadì che tals discurs amicabels sajan impurtants per sviluppar vinavant las relaziuns. Sco vischins directs hajan il Grischun e la Lumbardia blers interess cuminaivels. Il discurs haja mussà ch'ins possia chattar – sin ina basa sauna – novas ideas per la prosperitad da tuts dus pajais. 
 

Fotografia agiuntada:
Las delegaziuns da las regenzas e dals parlaments dal chantun Grischun e da la regiun Lumbardia a chaschun da la scuntrada a Le Prese.