L'uffizi chantunal per la natira e l'ambient ha analisà la qualitad da l'aua en ils lais da l'Engiadin'ota. El vuleva chattar ora, sch'ina mendra qualitad da l'aua fiss responsabla per main peschs pigliads. Ils resultats na dattan naginas indicaziuns en chaussa. 

En ils lais da l'Engiadin'ota èn vegnids pigliads – tenor la statistica dals peschs pigliads – ils onns 2004 fin 2007 fin a 60 pertschient damain salmelins da lai. La quota dals peschs pigliads è dapi lura stabila, ma sa chatta sin in nivel bass. En il Lai da Segl han ins empruvà l'emprim da chattar ora faschond analisas dal dretg da pestga, tge che pudessan esser ils motivs per quest regress. Igl è sa mussà ch'ils salmelins da lai èn sauns, ch'els han ina buna creschientscha e ch'els èn avant maun en tut las grondezzas.
Cun analisas da l'ecologia da l'aua vulevan ins alura sclerir, sch'ina mendra qualitad da l'aua pudess esser responsabla per il regress dals peschs pigliads. Per l'emprima giada suenter l'onn 1993 èn l'october 2013 e l'onn current puspè vegnidas fatgas mesiraziuns en ils lais da l'Engiadin'ota, e quai sin incarica da l'uffizi per la natira e l'ambient. Il resultat: L'aua en ils lais da l'Engiadin'ota ha ina qualitad ch'è cumparegliabla cun quella anteriura, respectivamain en tscherts lieus schizunt meglra. Il Lai da Segl ed il Lai da Silvaplauna han ina qualitad da l'aua fitg buna cun in cuntegn d'oxigen suffizient fin al funs dal lai. En il Lai da Champfèr ed en il lai da San Murezzan è il cuntegn da fosfor regredì cleramain, ma en omadus lais exista in deficit d'oxigen en las auas profundas. Il regress dals peschs pigliads ch'è vegnì observà na po dentant da princip betg vegnir declerà cun ina mendra qualitad da l'aua. Per obtegnair dapli enconuschientschas vegn ultra da quai analisada l'ecologia da las auas dals lais. Cunzunt davart il plancton sco basa da nutriment per ils peschs ston vegnir fatgs ulteriurs scleriments. 
 

Agiunta: 
Rapport "Resultats actuals da l'analisa da la qualitad da l'aua dals lais da l'Engiadin'ota"
 

Infurmaziuns:
Marco Lanfranchi, uffizi per la natira e l'ambient, tel. 081 257 29 46, e-mail Marco.Lanfranchi@anu.gr.ch  
 

Gremi: uffizi per la natira e l'ambient
Funtauna: rg uffizi per la natira e l'ambient