Il cussegl grond decida en la sessiun da december davart trais ulteriuras fusiuns da vischnancas en il chantun. La regenza ha deliberà las missivas tar las fusiuns da vischnancas da Calanca, da Scuol e da Zernez. Las novas vischnancas duain vegnir stabilidas per il cumenzament da l'onn 2015. 

Nova vischnanca da Calanca
En la Val Calanca fusiuneschan 4 dad 8 vischnancas: Las vischnancas dad Arvigo, Braggio, Cauco e Selma han approvà la fusiun a la nova vischnanca da Calanca unanimamain il fanadur 2014. En ils egls da la regenza è cun quai vegnì fatg in pass decisiv vers ina fusiun da vallada che duai restar vinavant la finamira. Stentas per ina fusiun da vallada datti gia dapi l'onn 2001. Fin entant èn ellas però restadas senza success. Ina fusiun cun las vischnancas restantas da Buseno, Castaneda, Rossa e Sta. Maria e.C. signifitgass ina concentraziun necessaria da las resursas finanzialas e persunalas en la Val Calanca. La fusiun da las vischnancas dad Arvigo, Braggio, Cauco e Selma vegn promovida dal chantun cun totalmain 1,2 milliuns francs.

La nova vischnanca da Calanca dispona d'ina surfatscha da 37,7 kilometers quadrat ed ha 205 abitantas ed abitants. Las quatter vischnancas collavuran dapi onns en intgins secturs. Dapi l'onn 1988 mainan ellas in'administraziun cuminaivla ad Arvigo. La gronda part da las incumbensas communalas vegnan però liquidadas en collavuraziun cun las autras vischnancas da la Val Calanca u schizunt en moda surregiunala. La scola primara vegn manada cuminaivlamain a Castaneda. La lingua uffiziala e la lingua da scola è talian en tut la Val Calanca. 

Novas vischnancas da Scuol e da Zernez
En la part da mez ed en la part sura da l'Engiadina bassa vegnan realisadas il medem mument duas fusiuns da vischnancas. Las vischnancas dad Ardez, Ftan, Guarda, Scuol, Sent e Tarasp fusiuneschan per il 1. da schaner 2015 a la nova vischnanca da Scuol, las vischnancas da Lavin, Susch e Zernez a la nova vischnanca da Zernez. Cun las duas fusiuns vegn rectifitgada la structura communala da l'Engiadina bassa. En la vallada ch'è per gonda part rumantscha datti en il futur anc las 4 vischnancas Zernez, Scuol, Valsot (vegnida creada l'onn 2013 da Ramosch e da Tschlin) e la vischnanca tudestga da Samignun. Grazia a las fusiuns èsi pussaivel da schliar differents consorzis a Scuol ed a Zernez, particularmain en ils secturs da la scola e da la selvicultura.

La nova vischnanca da Scuol daventa la pli gronda vischnanca da la Svizra cun 438,77 kilometers quadrat. Il dumber d'abitantas e d'abitants importa 4725. Las votantas ed ils votants dad Ardez, Ftan, Guarda, Scuol, Sent e Tarasp han approvà la fusiun la fin da mars 2014 cun tut en tut 78,9 pertschient da las vuschs. La contribuziun da promoziun chantunala importa totalmain 10 milliuns francs. La nova vischnanca duai appartegnair al circul da Suot Tasna. Las 6 vischnancas fusiunantas tutgan tar la corporaziun regiunala Pro Engiadina bassa sco er tar il district da l'En. Cun la realisaziun da la refurma dal territori daventa Scuol ina part integrala da la regiun Engiadina bassa/Val Müstair. Tenor il contract da fusiun vegn la scola manada en ina moda e maniera decentrala, ils stgalims superiurs sa chattan a Scuol ed a Sent. L'Institut autalpin Ftan è la scola media regiunala da l'Engiadina bassa.

La nova vischnanca da Zernez ha ina surfatscha da 344 kilometers quadrat e 1597 abitantas ed abitants. La fusiun è vegnida approvada da las votantas e dals votants l'avrigl 2014 cun 79,8 pertschient da las vuschs. La fusiun vegn sustegnida dal chantun cun totalmain 3 milliuns francs. Lavin, Susch e Zernez cunfineschan in cun l'auter ed appartegnan al circul da Sur Tasna. Cun la realisaziun da la refurma dal territori vegn la nova vischnanca da Zernez er ad appartegnair a la regiun Engiadina bassa/Val Müstair.
Zernez cun sia funcziun d'in center regiunal dispona – ultra d'ina vasta purschida da servetschs – er d'ina infrastructura da scola per tut il temp da scola obligatoric. Zernez è gia oz ina da las vischnancas da la Svizra cun la pli gronda surfatscha e cun guauds fitg vasts. Passa dus terzs da la surfatscha dal Parc naziunal svizzer ch'è vegnì fundà l'onn 1914 sa chattan sin il territori communal da Zernez. Sin il territori communal da Susch e per part da Lavin sa chatta la staziun da chargiada Sagliains da la Viafier retica, ch'è vegnida messa en funcziun l'onn 1999 cun l'avertura da la lingia dal Veraina.

Il cussegl grond vegn e debattar en la sessiun da december 2014 davart las fusiuns da las vischnancas da Calanca, da Scuol e da Zernez. Sch'il parlament approvescha questas fusiuns, sa reducescha il dumber da vischnancas en il Grischun dad actualmain 146 ad anc 125 per il 1. da schaner 2015. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
 

Gremi: regenza
Funtauna: rg chanzlia chantunala dal Grischun