Las ultimas trais emnas hai stuì vegnir constatà che pliras columbas da la baselgia da son Martin èn crappadas. L'uffizi per la segirezza da victualias e per la sanadad d'animals (USVA) ha instradà retschertgas cumplessivas per eruir ils motivs da questas perditas. Ussa è enconuschenta la diagnosa definitiva. Las columbas èn infectadas cun il "Pigeon Paramyxovirus 1" che vegn er numnà pesta da columbas. Quest virus chaschuna malsognas mortalas e po da princip infectar er giaglinom da niz. Tar umans che han stretg contact cun animals malsauns poi dar sut tschertas circumstanzas ina inflammaziun da la congiuntiva en la foppa dals egls. Perquai èsi impurtant da resguardar las mesiras d'igiena minimalas en connex cun columbas e da tutgar nagins animals malsauns u crappads. 

Decurs e diagnosa 
Las ultimas trais emnas è crappada passa la mesadad da las ca. 120 fin 140 columbas da la baselgia da son Martin. Sin basa d'analisas voluminusas dals animals crappads ha l'institut per bacteriologia veterinara da l'universitad da Turitg, partiziun per malsognas da giaglinom, pudì far la diagnosa "Pigeon Paramyxovirus 1". 

Sintoms, infecziuns e decurs 
La pesta da columbas è ina varianta dal "Newcastle Disease" (ND) ed è ina malsogna virala fitg contagiusa da las columbas. Autras spezias d'utschels sco aucas, andas, utschels da chabgias, utschels selvadis ed er giaglinom da niz èn main periclitads. Il cas actual è ina furma acuta mortala senza sintoms perceptibels. Per part han las columbas er disturbis dal sistem central da la gnerva sco paralisa da las chommas u da las alas. Sche l'uman ha stretg contact cun las columbas malsaunas po el s'infectar sur tut ils secrets ed excrets e survegnir ina inflammaziun da la congiuntiva en la foppa dals egls. Ins dastga supponer ch'in pitschen dumber da la populaziun da columbas vegnia a surviver la malsogna. 

Mesiras ordinadas 
En collavuraziun cun la citad da Cuira ha l'uffizi per la segirezza da victualias e per la sanadad d'animals (USVA) analisà la situaziun ed instradà las mesiras necessarias. Il chaset da columbas vegn surveglià, nettegià e dischinfectà pli savens. Cadavers d'animals vegnan rimnads e dismess senza privel per l'ambient. Pervia dal privel d'infecziun vegn la populaziun supplitgada da betg pavlar las columbas, d'evitar il contact cun excrements d'utschels sco er cun columbas malsaunas u crappadas e d'annunziar cadavers d'animals chattads a la polizia da la citad da Cuira: 081 254 53 00.
A las possessuras ed als possessurs d'autras spezias d'utschels e da giaglinom da niz vegni recumandà d'evitar il contact cun las columbas. Allevaturas ed allevaturs da columbas han la pussaivladad da laschar vaccinar lur columbas cunter la pesta da columbas tras la veterinaria u il veterinari. 
  

Infurmaziuns:
Dr. med. vet. Rolf Hanimann, veterinari chantunal, tel. 081 257 24 11, e-mail: rolf.hanimann@alt.gr.ch  
 

Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals