La regenza grischuna ha approvà in project per sviluppar vinavant las purschidas da viandar e per promover il turissem da stad en il chantun Grischun. 

Approvà il nov project grischunHIKE
A grischunBIKE suonda grischunHIKE. La regenza ha acceptà in project per promover ils onns 2015 fin 2018 il turissem da viandar ed ha deliberà per quest intent ina contribuziun da totalmain 800 000 francs en il rom da la nova politica regiunala (NPR) da la confederaziun e dal chantun. Ils custs totals dal project dal post spezialisà per il traffic betg motorisà da l'uffizi da construcziun bassa importan 3,2 milliuns francs. Sin fundament da las experientschas ch'èn vegnidas fatgas cun il project grischunBIKE per promover il sport da velos da muntogna duain ussa vegnir meglieradas en moda concentrada er las cundiziuns generalas per il sectur dal traffic betg motorisà/viandar en il Grischun. Las finamiras èn quellas da meglierar la cumpetitivitad dal chantun ed en spezial d'augmentar las pernottaziuns e las frequenzas da las interpresas da transport durant ils mais da stad. Tranter auter vegn la rait chantunala da sendas da viandar examinada en collavuraziun cun las vischnancas e cun las organisaziuns turisticas. Ultra da quai vegnan tschernidas spassegiadas spezialmain bellas e projects da pilot per optimar la purschida. Plinavant duain sa furmar cooperaziuns da viandar specificas cun federaziuns naziunalas e cun firmas. Tut en tut èn previsas passa 30 mesiras en il rom dal project. Il post spezialisà per il traffic betg motorisà da l'uffizi da construcziun bassa vegn ad incumbensar in post extern da sustegnair la realisaziun dal concept (direcziun dal project). 
 

Da vischnancas e da regiuns 

• Guarda: La revisiun parziala da la planisaziun locala, concludida da la vischnanca da Guarda il 1. da matg 2014, vegn approvada. En quest connex vegn ina surfatscha da radund 2500 meters quadrat ch'è situada en la zona d'abitar e da mastergn en il territori da Pramanan attribuida da nov a la zona d'agricultura. Sper la dezonaziun datti enzonaziuns pli pitschnas en la dimensiun da totalmain 336 meters quadrat. Plinavant cuntegna la nova planisaziun d'utilisaziun la determinaziun d'ina via d'avertura planisada (1. e 2. etappa) per lung da l'ur nord dal vitg da Guarda, la quala duai manar sur ils territoris da Chant Val e da Pramanan fin en il territori da Prà Mazun.
• Lantsch: La revisiun parziala da la planisaziun locala, concludida da la vischnanca da Lantsch ils 4 da december 2013, vegn approvada. La revisiun parziala cuntegna la determinaziun d'ina zona da lieus sitgs en connex cun l'engrondiment da la zona da campadi en il territori da Sozas.

Contribuziuns chantunalas a differentas instituziuns 

• Arena alva telefericas SA: A l'Arena alva telefericas SA vegn garantida ina contribuziun chantunala da 500 000 francs per construir il parc da freestyle a Laax, e quai en il rom dal concept per implants da sport d'impurtanza naziunala (CISIN). La confederaziun vegn medemamain a pajar ina contribuziun CISIN en quella dimensiun. Cun l'implant duain vegnir stgaffidas cundiziuns da trenament idealas per las atletas ed ils atlets da Swiss-Ski en ils secturs da freestyle (disciplina freeski) e snowboard durant ils mais da december fin mars. Ultra da quai porscha l'implant premissas idealas per cuntinuar cun concurrenzas internaziunalas. Ils custs d'investiziun totals importan circa 7,7 milliuns francs. 

Gremi: regenza
Funtauna: rg chanzlia chantunala dal Grischun