La regenza grischuna ha nominà Reto Knuchel sco nov inschigner chantunal. El vegn a surpigliar questa funcziun il 1. d'avrigl 2015.

La regenza grischuna ha elegì Reto Knuchel da Tscheppach SO sco nov manader dal post da servetsch. El ha 50 onns ed è inschigner da construcziun SAS cun diplom supplementar en la gestiun d'interpresas SEA. Knuchel lavura dapi l'onn 1998 tar l'uffizi da construcziun bassa dal Grischun sco manader da la partiziun per il mantegniment da vias. Dapi l'onn 2008 è el ultra da quai, sco manader da la regiun V, responsabel per la gestiun e per il pitschen mantegniment architectonic da las vias naziunalas. Avant ch'el ha cumenzà en l'administraziun chantunala ha Knuchel lavurà durant 12 onns tar las Viafiers federalas svizras ed en l'economia privata en il sectur da la construcziun da punts e da tunnels. El daventa successur da l'inschigner superiur Heinz Dicht che va – suenter ses engaschament da 30 onns sco manader da l'uffizi – en pensiun per ils 31 da mars 2015.

Cun ses var 500 collavuraturas e collavuraturs è l'uffizi da construcziun bassa dal Grischun cumpetent per la projectaziun, per la construcziun, per il mantegniment e per la gestiun da las vias chantunalas sco er per la correcziun dals curs d'aua en il Grischun. Per incumbensa da l'uffizi federal da vias procura el ultra da quai per il mantegniment funcziunal da las vias naziunalas sin il territori dal Grischun. L'inschigner chantunal è suttamess directamain al schef dal departament da construcziun traffic e selvicultura. 


Fotografia agiuntada: