La regenza grischuna ha lantschà duas novas acziuns per spargnar energia en il sectur dals edifizis. Ultra da quai ha la regenza adattà l'ordinaziun dal persunal. 

Duas novas acziuns da promoziun per dapli effizienza energetica
Il chantun lantscha duas novas acziuns da promoziun temporaras per dapli effizienza energetica. Ils onns 2015 e 2016 vegnan sustegnids sin dumonda cun contribuziuns tant il remplazzament d'implants d'illuminaziun en edifizis che na servan betg ad intents d'abitar sco er sanaziuns tenor ils standards da Minergie. Cun resalva ch'il preventiv vegnia approvà tras il parlament ha la regenza deliberà per l'onn 2015 tut en tut 900 000 francs per tuttas duas acziuns da promoziun. L'autezza dal preventiv da promoziun da l'onn 2016 vegn fixà pli tard.
Sch'in implant d'illuminaziun convenziunal existent vegn remplazzà tras ina illuminaziun moderna da LED, po l'effect da respargn dal consum d'electricitad importar sur 60 pertschient. Per ch'il remplazzament d'illuminaziuns installadas en moda fixa en edifizis existents che na servan betg ad intents d'abitar vegnia sustegnì cun ina contribuziun, ston vegnir duvrads implants d'illuminaziun optimads energeticamain (funtaunas da glisch, parts tecnicas e paraglischs). Resguardadas vegnan sanaziuns a partir d'ina surfatscha illuminada da 200 meters quadrat.
Cun l'acziun da promoziun "sanaziuns tenor ils standards da Minergie" duai vegnir serrada ina largia. Il dumber da sanaziuns cumplettas d'edifizis sin basa da programs da promoziun ch'existan gia duai vegnir augmentà uschia supplementarmain. Per survegnir la contribuziun per ina sanaziun tenor ils standards da Minergie ston vegnir fatgas investiziuns en ils mirs u en installaziuns da la tecnica da chasa.
Dals documents sco er da las dumondas tar las acziuns da promoziun pon ins prender invista a partir dal 1. da schaner 2015 sin la pagina d'internet da l'uffizi chantunal d'energia e da traffic (www.aev.gr.ch). 

Ordinaziun dal persunal: prevenziun da vegliadetgna e tezzar a la plazza da lavur
La regenza ha midà l'ordinaziun dal persunal. La revisiun parziala ch'entra en vigur il 1. da schaner 2015 concerna la repartiziun da las contribuziuns a la cassa da pensiun ed il tezzar a la plazza da lavur.
Concernent l'emprim punct vegn l'ordinaziun adattada a la lescha davart la cassa da pensiun dal Grischun ch'è vegnida midada dal cussegl grond. I vegn stgaffida ina nova categoria da vegliadetgna (vegliadetgna da 20–24 onns), per la quala vegn incassada ina contribuziun da spargn da totalmain 7 pertschient. Ultra da quai vegn augmentada la contribuziun da spargn a partir da la vegliadetgna da 45 onns per tut en tut 1 pertschient. La nova graduaziun da las contribuziuns da spargn dumonda in'adattaziun da la repartiziun da las contribuziuns a la cassa da pensiun tranter l'administraziun chantunala sco patruna e las collavuraturas ed ils collavuraturs sco emploiads.
Per realisar l'obligaziun dal dretg internaziunal da metter a quint l'absenza da tezzar da las collavuraturas respectivas sco temp da lavur pajà sa basa l'ordinaziun dal persunal da nov directamain sin la regulaziun en la legislaziun da lavur da la confederaziun. Uschia surpiglia l'administraziun chantunala quellas prescripziuns che valan tenor il dretg federal tant per l'economia privata sco er gia per las instituziuns chantunalas autonomas da dretg public. 

Il batschigl d'accumulaziun Molina vegn svidà per lavurs da reparaziun
Sut tschertas cundiziuns ha la regenza concedì a la Calancasca SA, Lostallo, la permissiun da derschentar e da svidar il batschigl d'accumulaziun Molina, vischnanca da Buseno. Il batschigl d'accumulaziun Molina è vegnì mess en funcziun l'onn 1951 e tschiffa l'affluent da la Calancasca. Cun svidar il batschigl d'accumulaziun po vegnir fatga ina reparatura necessaria dal scul da basa. I vegn fatg quint cun lavurs da reparatura che duran 3 fin 4 emnas. 

La midada da la lescha federala davart la taglia sin il petroli vegn beneventada
La regenza grischuna beneventa ina midada da la lescha federala davart la taglia sin il petroli che prevesa da deliberar ils vehichels da pista per part da questa taglia. Ils vehichels da pista duain vegnir deliberads da la taglia sin ielis minerals en quella dimensiun, en la quala quests retgavs fiscals èn destinads per il traffic sin via. L'impuls per questa revisiun parziala da la lescha davart la taglia sin il petroli deriva d'ina moziun dal cusseglier dals chantuns Isidor Baumann ch'il parlament federala ha acceptà. La regenza grischuna sustegna il giavisch da questa moziun senza in'unica resalva. La moziun gida a rinforzar il turissem d'enviern en Svizra ed en spezial en il territori da muntogna. L'incumbensa dal parlament na vegn però betg realisada en il project da revisiun uschia, sco che la moziun l'avess vulida. Per la deliberaziun da la taglia na cuntegna la moziun Baumann nagins criteris ecologics cun ina differenziaziun tenor filters cunter particlas da fulin. Quest element refusa la regenza. 
 

Da vischnancas e da regiuns 

• Alvra: La lescha da taglia da la nova vischnanca d'Alvra (ch'è resultada tras la fusiun da las vischnancas d'Alvagni, Alvaschagn, Brinzauls, Casti, Mon, Stierva e Surava) dals 27 da zercladur 2014 vegn approvada.
• Calanca: La constituziun da la nova vischnanca da Calanca (ch'è resultada tras la fusiun da las vischnancas d'Arvigo, Braggio, Cauco e Selma) dals 19 d'october 2014 vegn approvada.
• Farera: La revisiun parziala da la lescha da taglia da la vischnanca da Farera dals 17 da zercladur 2014 vegn approvada. Cun la revisiun vegn stgaffida la pussaivladad d'incassar ina taxa da giasts ed ina taxa per promover il turissem.
• Landquart: La revisiun parziala da la planisaziun locala, concludida da la vischnanca da Landquart ils 18 da matg 2014, vegn approvada. La revisiun parziala cuntegna d'ina vart ina revisiun dal plan da zonas per renovar l'abitadi en il territori "Ried". Planisada è la construcziun d'in nov hotel sco er d'ina nova halla da sport che po er vegnir duvrada per auters intents. Da l'autra vart pussibilitescha la nova planisaziun d'utilisaziun da la Ziegelei Landquart SA in engrondiment da l'explotaziun d'arschiglia en il territori "Zur Burg".
• Luzein: La nova lescha davart taxas da giasts dals 18 da zercladur 2014 da la vischnanca da Luzein vegn approvada. La lescha davart il turissem po vegnir interpretada en accordanza cun il dretg surordinà.
• Mesauc: Las revisiuns da la planisaziun locala da la vischnanca da Mesauc dals 12 da mars 2012 concernent ils cunfins dal guaud suspendids fin ussa sco er dals 18 da mars 2013 concernent in plan da zonas 1:2000 "Campagna d'Andergia" vegnan approvadas cun resalva.
• Razén: La revisiun parziala da la planisaziun locala da la vischnanca da Razén dals 27 da mars 2014 vegn approvada. Il project è in'elavuraziun posteriura da la revisiun totala dals 18 da mars 2009. Uschia èn vegnidas fatgas differentas correcturas areguard il tractament d'objects che ston vegnir protegids tenor la legislaziun davart la protecziun da la natira e da la patria. Plinavant è il plan general d'avertura vegnì cumplettà en il rom da l'ulteriura elavuraziun cun duas rutas da velos da muntogna.
• Scuol: La constituziun da la nova vischnanca da Scuol (ch'è resultada tras la fusiun da las vischnancas d'Ardez, Ftan, Guarda, Sent, Scuol e Tarasp) dals 24 d'avust 2014 vegn approvada.
• Zernez: La lescha da taglia da la nova vischnanca da Zernez (ch'è resultada tras la fusiun da las vischnancas da Lavin, Susch e Zernez) dals 23 da zercladur 2014 vegn approvada.
• Ziràn-Reschen: La revisiun parziala da la lescha da taglia da la vischnanca da Ziràn-Reschen dals 13 da december 2013 vegn approvada. La revisiun pertutga il termin da pajament.

Contribuziuns chantunalas a differentas instituziuns 

• Servetschs psichiatrics dal Grischun: Als servetschs psichiatrics dal Grischun vegn garantida ina contribuziun chantunala da construcziun da 114 720 francs per remplazzar l'ascensur en la chasa da dimora a Giuvaulta. La garanzia vegn dada cun la resalva che la finanziaziun restanta saja segirada.

Gremi: regenza
Funtauna: rg chanzlia chantunala dal Grischun