Suenter ina stagiun da construcziun intensiva vegn la punt sur il Rain tar il chastè da Rehanau puspè dada libra per vehichels fin 7 tonnas a partir da venderdi saira, ils 21 da november 2014.

La punt sur il Rain vegn restaurada durant 2 onns. Las mesiras da rinforz vi da la construcziun da travs d'atschal ch'èn stadas planisadas per l'emprim onn da construcziun ed il remplazzament da la platta dal vial han pudì vegnir realisads cun success. Pervia da la trid'aura n'han las lavurs da protecziun cunter la corrosiun vi da la platta dal vial betg pudì vegnir realisadas sco planisadas. Quai premetta che la punt sur il Rain sto vegnir serrada anc ina giada per var 6 emnas l'onn che vegn. Durant ils mais d'enviern vegn il traffic manà sur ina cuvrida provisorica.
Il project da reparaziun da la punt sur il Rain a La Punt prevesa da glimar giu cumplettamain la protecziun da corrosiun veglia e da la remplazzar tras in sistem da surtratga da pliras vettas. Als lieus sensibels sco per exempel tar las sfessas tranter las singulas parts purtantas vegnan fixadas stuppadiras supplementaras resp. surtratgas autamain flexiblas. Ultra da quai duain questas parts sensiblas vegnir fixadas supplementarmain cun struvas. Grazia a questas mesiras vegn cuntanschida ina durada da la protecziun da 40 onns. Il vial da betun actual vegn remplazzà tras ina platta d'atschal che va d'ina vart da la punt a l'autra. Sin quella vegn fixada ina cuvrida satiglia e betg memia groppa. Per augmentar la durada d'utilisaziun da questa construcziun artifiziala istorica èn planisadas ulteriuras mesiras da rinforz che na midan però betg l'apparientscha da la punt. Ils custs vegnan calculads cun circa 4 milliuns francs. 


Infurmaziuns:
- Roger Stäubli, schef da la construcziun da vias, uffizi da construcziun bassa dal Grischun, tel. 081 257 38 42
- Peter Stirnimann, incumbensà per l'infurmaziun da l'uffizi da construcziun bassa dal Grischun, tel. 079 291 72 75 


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun