La regenza grischuna ha mess en vigur la lescha generala davart la refurma da la gulivaziun da finanzas per il 1. da schaner 2016. Plinavant ha la regenza renconuschì custs da tgira pli auts per las chasas da persunas attempadas e da tgira. 

La refurma da la gulivaziun da finanzas va en vigur l'onn 2016
La lescha generala davart la refurma da la gulivaziun da finanzas – che sa cumpona da la revisiun totala da la lescha davart la gulivaziun da finanzas e da 20 revisiuns parzialas – vegn messa en vigur per il 1. da schaner 2016. Uschia po vegnir realisà in project da refurma chantunal impurtant che rinforza las vischnancas. Ils 28 da settember 2014 aveva il pievel grischun acceptà il project cun 32 019 cunter 16 431 vuschs. La gulivaziun da finanzas per las vischnancas grischunas vegn renovada fundamentalmain, e numerusas contribuziuns tranter il chantun e las vischnancas crodan davent u vegnan adattadas. En l'emprima mesadad da l'onn 2015 vegn la regenza a far las adattaziuns necessarias vi da las ordinaziuns da la regenza e vers la fin da la stad 2015 vegn ella ad infurmar las vischnancas davart ils pajaments decisivs per l'onn 2016. Ultra da quai vegn l'uffizi da vischnancas a publitgar a temp ulteriuras infurmaziuns utilas che duain facilitar a las vischnancas da far la midada al nov sistem da gulivaziun da finanzas. 

Custs pli auts tar la tgira da persunas attempadas e malsaunas
Ils custs renconuschids per las chasas da persunas attempadas e da tgira sco er per ils servetschs da la tgira ed assistenza a chasa vegnan adattads. Per il 1. da schaner 2015 ha la regenza concludì ina revisiun parziala da l'ordinaziun tar la lescha per promover la tgira da persunas malsaunas.
Tras quai ch'ils custs renconuschids per las chasas da persunas attempadas e da tgira vegnan auzads sin 1.12 francs per minuta da tgira (fin ussa 1.00 francs), resulta l'onn 2015 in augment budgetà dals custs da tgira da tut en tut 9 milliuns francs per onn – custs ch'il chantun e las vischnancas ston surpigliar proporziunalmain. La regenza spera che l'augment dals custs da tgira sa nivelleschia puspè ils onns suandants. Percunter porta ina reducziun da la media dals custs da pensiun e d'assistenza en las chasas da persunas attempadas e da tgira ina distgargia da var 2,5 milliuns francs tar las prestaziuns supplementaras.
L'augment dals custs renconuschids per ils servetschs da la tgira ed assistenza a chasa chaschuna al chantun custs supplementars da 0,33 milliuns francs cumpareglià cun l'onn 2014. Per las vischnancas resultan custs supplementars da 0,27 milliuns francs. 

Cumplettà l'ordinaziun davart il diever da chauns da chatscha
Per garantir che la chatscha correspundia a la protecziun dals animals, èn ils chantuns obligads da reglar la scolaziun e las acziuns cun chauns da chatscha. En vista a tscherts geners da chatscha regla il dretg federal er la scolaziun e l'examen da chauns da chatscha utilisond animals selvadis vivs. Stabiliments per scolar e per examinar chauns da chatscha vi d'animals vivs dovran damai ina permissiun da l'autoritad chantunala cumpetenta. Plinavant sto mintga occurrenza da quest gener vegnir annunziada a l'autoritad. En il Grischun n'hai actualmain nagins stabiliments per scolar e per examinar chauns da chatscha vi d'animals selvadis vivs, e planisads n'èn er nagins. Tuttina na vegn il chantun betg liberà da l'obligaziun da reglar las cumpetenzas chantunalas. La regenza ha fatg quai tras ina revisiun parziala da l'ordinaziun davart il diever da chauns da chatscha. Las cumpetenzas correspundentas ha ella attribuì a l'uffizi da chatscha e pestga. 

Il Grischun è chantun ospitant a la festa dal 1. d'avust 2015 a Paris
Il Grischun sa preschenta l'onn 2015 sco chantun ospitant a la festa dal 1. d'avust a Paris, che vegn organisada da l'organisaziun dals Svizzers a l'ester. Las festivitads per il di da la festa naziunala svizra han mintgamai lieu l'ultima sonda da fanadur sin l'areal da la Cité Université a Paris, l'onn proxim è quai ils 25 da fanadur 2015. L'occurrenza è publica e vegn visitada dad intgins tschients persunas. Tradiziunalmain vegn envidà in chantun a las festivitads en Frantscha. Il chantun ospitant survegn la chaschun da preschentar a Paris sasez e sia cultura, sias tradiziuns, sias delicatessas culinaricas e la purschida turistica. Per la preschentaziun dal Grischun vegni fatg quint cun custs totals da maximalmain 30 000 francs. 
 

Da vischnancas e da regiuns 

• Arosa: A la vischnanca d'Arosa vegn garantida ina contribuziun da 139 500 francs per renovar il provediment d'aua da la fracziun Peist, etappa 2015, remplazzament dal reservuar Zalgort. La garanzia premetta in subvenziunament tras la confederaziun. 

Contribuziuns chantunalas a differentas instituziuns  

• Uniun "historic RhB": A l'uniun "historic RhB" vegn concedida ina contribuziun unica da 150 000 francs per projects che vulan elavurar ed intermediar bains culturals istorics mobils da la Viafier retica. L'uniun ha l'intent da tgirar e da mantegnair sin basa d'utilitad publica l'ierta istorica dals vehichels da la Viafier retica sin sia rait. Plinavant vul l'uniun mantegnair vehichels che na funcziunan betg pli, ma ch'èn d'ina valur tecnica u istorica unica, e render accessibels quels a la publicitad. 

Gremi: regenza
Funtauna: rg chanzlia chantunala dal Grischun