En il chantun Grischun duain tut las votantas e tut ils votants pudair votar ed eleger a partir da l'onn 2020 electronicamain sur l'internet. L'onn 2016 èn planisadas en las vischnancas da Cuira, Tavau, Donat, Glion, Puschlav e Val Stussavgia emprimas emprovas da pilot cun votantas e votants svizzers en Svizra.

Il chantun Grischun ha fatg durant plirs onns experientschas cun il vote électronique: Dapi l'onn 2010 pon Svizras e Svizzers a l'exteriur votar en il Grischun sin via electronica sur l'internet. Suenter che la fasa d'emprova cun las Svizras ed ils Svizzers a l'exteriur è stada positiva, vul la regenza etablir il vote électronique sco terz chanal da votaziun cumplet per tut las votantas e tut ils votants – sper la votaziun a l'urna e la votaziun per correspundenza. 

Emprovas da pilot a partir da l'onn 2016
La votaziun electronica vegn introducida pass per pass en il Grischun. En in'emprima etappa duain vegnir fatgas emprovas cun il vote électronique ensemen cun las votantas ed ils votants da las vischnancas da pilot da Cuira, Tavau, Donat, Glion, Puschlav e Stussavgia. Cun tscherner las vischnancas da pilot èsi vegnì dà paisa ad ina maschaida equilibrada. Criteris èn stads il dumber da votantas e votants sco er las relaziuns tecnicas, organisatoricas, linguisticas e giuridicas da las vischnancas. Il chantun e las vischnancas da pilot cumenzan quest mais cun las lavurs preparatoricas tecnicas ed organisatoricas. L'onn 2016 duai il vote électronique lura pudair vegnir purschì a las var 38 000 persunas cun dretg da votar en las vischnancas da pilot. Ils custs per organisar e per tegnair en funcziun las infrastructuras chantunalas sco er las indemnisaziuns per infrastructuras communalas vegnan stimads a 220 000 francs durant la fasa da pilot e vegnan pajads sur il quint current. Ils credits correspundents vegnan fixads mintga onn dal cussegl grond ensemen cun il preventiv. Per las vischnancas resultan custs supplementars minimals en spezial en connex cun l'attest da votar da vote électronique. Uschespert che la finamira a lunga vista dal vote électronique, che na dovra nagin palpiri, è cuntanschida, pon las vischnancas far quint cun respargns da custs considerabels. 

En etappas al vote électronique per tut las votantas e tut ils votants
Sche las emprovas èn positivas, vul la regenza proponer al cussegl grond d'introducir definitivamain il vote électronique e da far las midadas correspundentas en la lescha. Suenter duai il vote électronique vegnir extendì sin tut las vischnancas grischunas e sin tut las votantas e tut ils votants dal Grischun. Quest proceder s'accorda cun la strategia dal cussegl federal che ha l'intenziun d'introducir il vote électronique en tut la Svizra. 

Sistem da vote électronique da la segunda generaziun – la segirezza è fitg impurtanta
La basa tecnica da la votaziun electronica è in sistem da vote électronique che vegn manà cuminaivlamain dals nov chantuns Grischun, Turitg, Argovia, Schaffusa, Turgovia, Son Gagl, Soloturn, Friburg e Glaruna en il rom dal consorzi Vote électronique ensemen cun in partenari privat. Questa collavuraziun interchantunala garantescha ina buna relaziun tranter ils custs ed il niz. Ils custs dal consorzi vegnan repartids sin ils chantuns tenor ina clav da repartiziun che sa drizza tenor ina summa da basa e tenor il dumber da persunas cun dretg da votar. Il sistem actual da vote électronique vegn sviluppà vinavant dal consorzi ad in sistem anc pli segir da la 2. generaziun. Il mars 2015 vegnan las Svizras ed ils Svizzers a l'exteriur ad avair per l'emprima giada la pussaivladad da verifitgar lur votaziun cun agid da codes da controlla ed uschia da guardar, sche lur vusch è vegnida transmessa correctamain al sistem da vote électronique. Qua tras pon las votantas ed ils votants vesair immediatamain mintga sort da manipulaziun sin lur plattafurma u en l'internet. Previsiblamain fin l'onn 2018 vegn il sistem da vote électronique sviluppà vinavant ad in sistem cumplainamain verifitgabel. Pir quest pass da svilup permetta d'introducir il vote électronique en tut il chantun. 
 

Infurmaziuns:
- dr. Claudio Riesen, chancelier, tel. 081 257 22 21
- Urs Marti, president da la citad da Cuira, tel. 081 254 41 01
- Tarzisius Caviezel, president communal da Tavau, tel. 079 610 23 70
- Gian Michael, president communal da Donat, tel. 078 602 11 80
- Aurelio Casanova, president communal da Glion, tel. 076 585 41 20
- Alessandro Della Vedova, president communal da Puschlav, tel. 078 735 05 86
- Thomas Buchli, president communal da Val Stussavgia, tel. 081 647 12 70 


Gremi: regenza
Funtauna: rg chanzlia chantunala dal Grischun