Il chantun Grischun ha scrit ora quest onn per l'emprima giada la "concurrenza scola e cultura". Tut en tut èn vegnidas inoltradas 36 dumondas fin la fin d'october. 

"Scola e cultura" sa numna il nov instrument da la promoziun da la cultura dal Grischun che duai permetter – cun ina contribuziun finanziala dal chantun – als uffants ed als giuvenils en las scolas grischunas in access anc pli multifar ad ina vasta chapientscha da la cultura. La finamira è d'entusiasmar las scolaras ed ils scolars uschè baud ed uschè durablamain sco pussaivel per la cultura.

En il rom da quest instrument da promoziun ha la promoziun da la cultura dal Grischun lantschà ina concurrenza ed ha envidà las scolas d'inoltrar projects d'art e da cultura ch'ellas han realisà. Il dretg da participaziun han gì las scolas dal Grischun dals suandants stgalims: scolina, 1. fin 9. classa, gimnasis inferiurs, scolas privatas (per las partiziuns dal temp da scola obligatoric). Las lavurs pudevan cumpigliar pliras classas u plirs stgalims e stuevan avair in connex cun la scola.

La concurrenza è vegnida annunziada il zercladur e l'avust 2014 en il Fegl scolastic grischun e supplementarmain l'avust 2014 en la pressa quotidiana grischuna. Il termin d'annunzia è scadì la fin d'october 2014. Las commembras ed ils commembers da la cumissiun, Margrit Darms-Landolt, commembra da la cumissiun chantunala per promover la cultura, Pit Noi, magister, ed Armon Fontana, promoziun da la cultura dal Grischun, han examinà ils 36 projects inoltrads da la fin d'october fin mez november.

Sin recumandaziun da la cumissiun da concurrenza e sin proposta da l'uffizi da cultura ha il departament d'educaziun, cultura e protecziun da l'ambient distinguì ils suandants trais projects cun in premi: 
 
1. premi (3000 francs)
scola primara da Tavau Frauenkirch, 2./3. classa
persunas d'instrucziun: Helene Elmer, Sabrina Gurini
Project: Dal graun al paun en l'istorgia da Tavau (istorgia culturala)

2. premi (2000 francs)
scola primara da Parpan, 1. – 6. classa
persunas d'instrucziun: Barbara Heeb, Karin Rischatsch
Project: L'istorgia d'ina culla che rodla adina puspè (art figurativ)

3. premi (1000 francs)
scola da Tusaun, 2. classa primara, 3. classa secundara
persunas d'instrucziun: Sabrina Kaufmann, Beatrice Sherlock (coaching: Lina Frei – Baselgia)
Project: Viadi enturn il mund (teater) 


Infurmaziuns:
- Barbara Gabrielli, manadra da l'uffizi da cultura, tel. 081 257 48 01, e-mail barbara.gabrielli@afk.gr.ch 
- Armon Fontana, promoziun da la cultura dal Grischun, tel. 081 257 48 02, e-mail armon.fontana@afk.gr.ch 
  

Gremi: uffizi da cultura
Funtauna: rg uffizi da cultura