L'aura variabla, la paralisa dals monis da las ivas e la drosofila da tscharescher han chaschunà grondas discussiuns tranter las viticulturas ed ils viticulturs durant l'onn 2014. Pervia da las circumstanzas difficilas è resultà in retgav mesaun, dentant ina qualitad surprendentamain buna da las ivas.

La vendemia 2014 importa 22 260 hl e correspunda a la media da 10 onns. Uschia resultan 3 milliuns buttiglias da vin a 7,5 dl u 15 buttiglias per mintga abitanta u abitant dal Grischun. La quantitad è 10 fin 20 pertschient pli bassa che las aspectativas, perquai che cunzunt la paralisa dals monis da las ivas ha chaschunà ina perdita da racolta. Questa paralisa è in disturbi, nua che las ivas survegnan memia paucas substanzas nutritivas.

Il pinot noir, la spezia da vit la pli impurtanta dal Grischun, ha cuntanschì in cuntegn da zutger ideal da 97 grads Oechsle. Per la buna qualitad datti dus motivs: la limitaziun consequenta da la quantitad e la lavur acribica da las viticulturas e dals viticulturs. Da retgavs raschunaivels resultan bunas qualitads, er sche las circumstanzas exteriuras n'èn betg idealas. Plinavant èsi sa mussà, quant impurtantas che las lavurs en las vignas èn, pertge ch'il crap da fundament per buns vins vegn tschentà là.

La drosofila da tscharescher, ina mustga cun il num scientific "drosophila suzukii", deriva oriundamain da l'Asia dal sidost ed è arrivada l'onn 2011 per l'emprima giada en il Grischun. L'onn 2014 ha ella chaschunà discussiuns ed inquietezza tranter las viticulturas ed ils viticulturs. Effectivamain èsi uschia che la perdita da racolta n'è betg stada extraordinaria pervia da la drosofila da tscharescher, ma la lavur per zavrar las ivas è per part stada enorma. L'onn 2015 vegni ad esser impurtant da perscrutar meglier la moda da viver da quest nov parasit e da far ulteriuras emprovas da cumbat. 
 
Remartga:
Davart la vendemia grischuna stat a disposiziun in video sut www.gr.ch. 
 

Infurmaziuns:
Hans Jüstrich, post spezialisà per pumicultura e viticultura al Plantahof, tel. 081 257 60 60, e-mail hans.juestrich@plantahof.gr.ch  
 

Gremi: Plantahof
Funtauna: rg Plantahof