La regenza ha deliberà il sboz d'ina lescha davart il princip da transparenza (lescha da transparenza) per la consultaziun. Questa lescha duai reglar l'access sin dumonda a documents uffizials.

Fin oz vala en il chantun Grischun il princip da secretezza, cun resalva da la transparenza. Tenor quel èn infurmaziuns che sa chattan sin il champ da cumpetenza d'organs publics mo excepziunalmain accessiblas per terzas persunas. Il dretg da survegnir infurmaziuns e da pudair prender invista da las actas ha mo, tgi che po far valair in interess particular. La nova lescha dat a mintga persuna il dretg d'access a documents uffizials, senza ch'i stoppia vegnir cumprovà in interess particular. Cun il project da consultaziun ademplescha la regenza ina incumbensa parlamentara ch'è vegnida acceptada durant la sessiun da zercladur 2014. A medem temp tegna ella quint dal svilup giuridic che ha lieu tar la confederaziun e tar la gronda part dals chantuns. 

Vasta applicaziun
La lescha vala da princip per tut ils organs publics, en spezial per las autoritads, per las administraziuns e per las cumissiuns dal chantun, da las regiuns e da las vischnancas. Applitgabla è ella er per il cussegl grond e per ils organs legislativs da las regiuns e da las vischnancas. I dat dentant excepziuns dal princip da transparenza. En il cas singul concret po l'access a documents uffizials vegnir restrenschì, suspendì, concedì sut cundiziuns u vegnir refusà. Quai è il cas, sch'igl èn avant maun interess publics u privats predominants che stattan en cuntradicziun cun in access. Exceptads dal dretg d'access restan ils documents da las sesidas da las cumissiuns parlamentaras da controlla, da surveglianza e d'investigaziun, perquai che talas cumissiuns s'occupan regularmain d'infurmaziuns sensiblas. 

Procedura simpla, svelta e gratuita
La procedura è simpla e svelta. Las dumondas d'invista vegnan giuditgadas per regla entaifer 20 dis. Sche l'autoritad refusa la dumonda, po la disposiziun vegnir contestada sco emprim entaifer l'administraziun. La procedura è gratuita. Pir sch'i dat in eventual recurs a la dretgira administrativa, pon resultar custs da dretgira. D'ina procedura da mediaziun vegni desistì, per pudair liquidar en moda speditiva la dumonda. 

Scolaziun e barat en dumondas specificas
La lescha da transparenza duai pudair vegnir applitgada en moda pratica e chapaivla. Per quest intent han lieu scolaziuns da las persunas responsablas sco er in barat d'experientschas regular cun las persunas interessadas. Disposiziuns supplementaras da l'ordinaziun n'èn betg previsas. Sco quai ch'igl è gia oz il cas duai la politica d'infurmaziun activa da las autoritads vegnir cuntinuada. Ella gida – tuttina sco il princip da transparenza – ad obtegnair transparenza tar l'activitad publica.

La consultaziun dura fin ils 24 d'avrigl 2015. Ils documents stattan a disposiziun en l'internet sut www.gr.ch/Consultaziuns currentas. 
 

Infurmaziuns:
chancelier dr. Claudio Riesen, tel. 081 257 22 21, e-mail Claudio.Riesen@staka.gr.ch
 

Gremi: regenza
Funtauna: rg chanzlia chantunala dal Grischun