La regenza grischuna preschenta al cussegl grond la missiva tar ina revisiun parziala da la lescha davart ils dis da paus publics. Tras l'adattaziun da la lescha davart ils dis da paus publics duai vegnir tegnì quint da las relaziuns socialas midadas. 

La lescha vertenta davart ils dis da paus publics è vegnida relaschada avant stgars 30 onns ed è restada en vigur dapi lura senza midadas. En il fratemp da quests stgars 30 onns èn las relaziuns socialas sa midadas sco er las ideas da la populaziun areguard la concepziun dals firads. Il cumportament da temp liber odiern però è er determinà dal giavisch da far scuntradas, barats culturals ed activitads da sport sco egualisaziun dal mintgadi da lavur.

Cun la revisiun parziala che vegn proponida da la regenza duai la lescha davart ils dis da paus publics vegnir adattada a las relaziuns socialas midadas. Occurrenzas che servan a la sanadad, a la recreaziun, al sport, a la cultura u al divertiment èn permessas a dis da paus publics, cun excepziun dals auts firads, premess ch'ellas na cuntrafetschian betg a l'intent da la lescha. 

Obligaziun da dumandar ina permissiun per occurrenzas ad auts firads
Er occurrenzas ad auts firads èn pussaivlas, ma en general èn ellas suttamessas a l'obligaziun da dumandar ina permissiun da las vischnancas. En il rom da la lescha survegnan las vischnancas la cumpetenza da permetter occurrenzas ad auts firads sin lur territori. Las vischnancas enconuschan las relaziuns localas ed èn perquai plitost en il cas da giuditgar ils disturbis da la quietezza e da l'urden durant in firà. Cun questa regulaziun vegnan er respectads avunda l'autonomia communala ed ils basegns dal turissem en il chantun.

Il cussegl grond vegn a tractar en la sessiun d'avrigl 2015 la missiva tar ina revisiun parziala da la lescha davart ils dis da paus publics. 


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch     
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail Andrea.Stadler@ekud.gr.ch 


Gremi: regenza
Funtauna: rg chanzlia chantunala dal Grischun