La regenza grischuna suttametta al cussegl grond la missiva ed il sboz per approvar la cunvegna interchantunala davart la renconuschientscha da certificats da scolaziun (cunvegna da diploms) che vegn adattada – cun las midadas dals 24 d'october 2013 resp. dals 21 da november 2013 – a las novas cundiziuns generalas dal dretg federal. 

La cunvegna da diploms è vegnida deliberada ils 18 da favrer 1993 da la conferenza svizra dals directurs chantunals da l'educaziun publica (CDEP). Dapi sia entrada en vigur l'onn 1995 regla ella la renconuschientscha naziunala dals certificats da scolaziun chantunals. L'access liber a las scolas da cuntinuaziun ed a la pratica da professiun duai vegnir promovì e la qualitad da las scolaziuns duai vegnir garantida. Tut ils chantuns èn sa participads a la cunvegna, il chantun Grischun gia l'onn 1995.

L'ultima revisiun è vegnida fatga l'onn 2005, dapi lura èn entradas en vigur novas disposiziuns dal dretg federal. La cunvegna duai vegnir adattada a quellas. La revisiun pertutga principalmain il register da las persunas spezialisadas dal sectur da sanadad sco er l'obligaziun d'annunzia da persunas d'instrucziun e d'osteopatas e d'osteopats da l'exteriur. Ultra da quai duai la cunvegna vegnir cumplettada cun ina disposiziun davart la cumpetenza da meds legals da l'autoritad da renconuschientscha.

Il cussegl grond vegn a tractar questa fatschenta en la sessiun d'avrigl 2015. 


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail Andrea.Stadler@ekud.gr.ch


Gremi: regenza
Funtauna: rg chanzlia chantunala dal Grischun