Il president da la regenza Martin Jäger ha survegnì visita da la generaziun giuvna politica da la citad da Cuira. L'inscunter cun la suprastanza dal parlament da giuvenils en la chasa grischa ha permess en emprima lingia d'emprender d'enconuscher in l'auter. 

Sco president da la regenza vuless Martin Jäger metter l'accent sin inscunters cun persunas giuvnas. Giuvenils duain vegnir avischinads als temas politics e duain vegnir sensibilisads per dumondas da l'avegnir. Ina scuntrada cun persunas giuvnas che han interess per la politica è la meglra occasiun per barattar experientschas ed infurmaziuns.

Las parlamentarias giuvnas ed ils parlamentaris giuvens han visità venderdi passà il president da la regenza grischuna Martin Jäger. La generaziun giuvna politica ha fatg dumondas davart la lavur dal president da la regenza dentant ha er exprimì giavischs generals che occupan la giuventetgna dal chantun Grischun. Per terminar la visita è vegnì servì in aperitiv als giuvenils preschents. 

Il parlament da giuvenils da la citad da Cuira è vegnì fundà l'onn 2013 e vegn sustegnì finanzialmain da la citad da Cuira. La finamira primara dal parlament da giuvenils è quella da laschar participar persunas giuvnas creschidas dal chantun Grischun activamain a la politica. El è l'organ da la giuventetgna ed il mediatur tranter la giuventetgna e la politica. Las participantas ed ils participants duain surpigliar responsabladad per lur ambient ed emprender d'enconuscher uschia ils princips da la politica communala e chantunala. 


Infurmaziuns:
president da la regenza Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient