La regenza grischuna ha deliberà la missiva tar la revisiun parziala da la lescha chantunala davart las vias per mauns dal cussegl grond. Meglierada vegn cunzunt la coordinaziun da la procedura. 

La lescha chantunala davart las vias da l'onn 2006 regla tranter auter la projectaziun sco er la construcziun, il mantegniment, l'utilisaziun e la finanziaziun da vias chantunalas. Cun la revisiun parziala da la lescha duain vegnir resguardadas las experientschas ch'èn vegnidas fatgas dapi lura. Differents resuns dals organs chantunals e communals ch'èn responsabels per l'execuziun mussan che oravant tut la coordinaziun da la procedura po vegnir meglierada. Sin basa d'autras leschas chantunalas vegn la regenza autorisada da decider en il rom da l'approvaziun d'in project da vias a medem temp er davart la concessiun d'ulteriuras permissiuns. 

Optimada vegn er la regulaziun areguard la signalisaziun da las vias. En l'avegnir n'èsi betg mo chaussa dal chantun da signalisar vias chantunalas, mabain er strivlas melnas e vials da velo. Tras quai po vegnir garantì in standard da signalisaziun unitar sin tut las vias chantunalas. In'ulteriura novaziun è quella che la pratica che vala dapi onns areguard l'obligaziun da dumandar ina permissiun per edifizis e stabiliments da terzas persunas en il sectur da las vias chantunalas vegn francada en la lescha.

La revisiun parziala resguarda la finala er differents giavischs ch'èn vegnids exprimids en il rom da la procedura da consultaziun. Uschia duai per exempel il traffic betg motorisà survegnir dapli paisa. Per quest intent vegnan ils vials da velo fixads sco parts integralas da la via chantunala. L'installaziun ed il mantegniment da vials da velo è pia en l'avegnir chaussa dal chantun. Plinavant cuntegna il project ina nova disposiziun, tenor la quala la responsabladad da pinar laina per segirezza e da tgirar la bostgaglia per lung da vias chantunalas vegn surdada en l'avegnir a l'uffizi da construcziun bassa.

Il cussegl grond vegn a tractar questa fatschenta en la sessiun da zercladur 2015. 


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  
 

Gremi: regenza
Funtauna: rg chanzlia chantunala dal Grischun