La regenza suttametta al cussegl grond duas missivas tar la protecziun da la populaziun e tar la protecziun civila. Las duas leschas duain remplazzar la lescha vertenta davart l'agid en cas da catastrofas. 

La lescha actuala davart l'agid en cas da catastrofas dals 4 da zercladur 1989 regla d'ina vart la protecziun da la populaziun e da l'autra vart la protecziun civila sco ina da las partenarias da la protecziun da la populaziun. Ils dus secturs duain vegnir reglads e concretisads en l'avegnir en leschas separadas. 

Relasch d'ina lescha davart la protecziun da la populaziun
La protecziun da la populaziun regla las incumbensas da las vischnancas e dal chantun en situaziuns spezialas ed extraordinarias. Da princip èn las vischnancas responsablas per la prevenziun e per il dumogn da tut ils eveniments sin lur territori communal. Ina vischnanca effizienta ed organisada en moda professiunala sto da princip esser en cas da dumagnar ina situaziun speziala. Il chantun sustegna mo ina vischnanca, sche quella na po betg pli dumagnar in eveniment. Sch'in cas ha effects surregiunals u chantunals, sto il chantun sustegnair las vischnancas u schizunt surpigliar la direcziun da dumagnar l'eveniment. Per quest intent regla la nova lescha detagliadamain l'attribuziun da las incumbensas a las vischnancas ed al chantun, e quai tenor las situaziuns. Per exempel duai la polizia chantunala manar il stab directiv chantunal durant la fasa acuta d'in eveniment e betg pli sco oz l'uffizi da militar e da protecziun civila. Pir durant la fasa da restabiliment sco er en la prevenziun d'ina situaziun speziala u extraordinaria duai la direcziun esser chaussa da l'uffizi da militar e da protecziun civila. Tenor il sboz da la lescha èn las vischnancas ed il chantun ultra da quai obligads da far in'analisa da las periclitaziuns. Privels pussaivels ston vegnir analisads ed i sto vegnir preschentà, co che quels pon vegnir minimads u schizunt eliminads en in cas d'eveniment tras mesiras preventivas. 

Relasch d'ina lescha davart la protecziun civila
La protecziun civila è ina da las partenarias da la protecziun da la populaziun ch'è concepida sco sistem da cooperaziun. Introducida oriundamain per dar dumogn a conflicts armads, è la protecziun civila oz concepida per dumagnar situaziuns extraordinarias. Cun l'entrada en vigur da la lescha federala davart la protecziun da la populaziun e la protecziun civila dal 1. da schaner 2004 èn ils chantuns daventads ils purtaders principals da la protecziun civila. Sin plaun chantunal èn las disposiziuns davart la protecziun civila però limitadas fin ussa ad intgins paucs artitgels formulads generalmain. Da nov vegn la repartiziun da las cumpetenzas e da las incumbensas tranter il chantun e las vischnancas, che vegn applitgada fin ussa per part mo en la pratica, reglada sin il stgalim da la lescha. En la nova lescha davart la protecziun civila vegn pia er realisada la prescripziun da la nova constituziun chantunala, tenor la quala disposiziuns impurtantas ston vegnir regladas sin il stgalim da la lescha.

En il sboz da consultaziun era previs che las vischnancas stoppian pajar enavos al chantun las contribuziuns substitutivas per plazzas protegidas betg construidas. Il chantun desista ussa da quai, pervia da la resistenza da vart da las vischnancas. Tenor il dretg federal dastgan las contribuziuns substitutivas vegnir duvradas mo per finanziar ils custs da scolaziun ed ulteriuras mesiras da la protecziun civila.

Il cussegl grond vegn a tractar questa fatschenta en la sessiun da zercladur 2015. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala dal Grischun