La nova centrala da commando da l'uffizi da construcziun bassa dal Grischun procura cun ses manaschi durant 24 uras per la segirezza sin las vias naziunalas e chantunalas. Ils custs vegnan surpigliads cuminaivlamain da la confederaziun e dal chantun. Ina impressiun da la centrala da commando dat in nov video da la chanzlia chantunala dal Grischun sut www.gr.ch.
 
En cas d'eveniments sustegna la centrala da commando la centrala d'acziuns da la polizia chantunala sco er ils pumpiers, tranter quels er il cumbat cunter donns San Bernardin, en il rom da lur acziuns. Uschia pon las organisaziuns a glisch blaua sa fidar d'ina partenaria cumpetenta che surveglia ils sistems tecnics cumplexs dals tunnels e che adatta quels – en enclegientscha cun ils auters posts – a las pretensiuns situaziunalas respectivas. La centrala da commando ha duas plazzas da lavur ch'èn equipadas cun ils meds auxiliars ils pli moderns. Il sistem chantunal directiv permetta – ensemen cun la surveglianza cumplessiva da video da las vias e dals tunnels – als operaturs da la centrala da commando da survegliar permanentamain tut la rait da vias dal chantun Grischun areguard la tecnica ed il mantegniment da las vias. 
 

Infurmaziuns:
- Reto Knuchel, inschigner chantunal da l'uffizi da construcziun bassa, e-mail: Reto.Knuchel@tba.gr.ch, tel. 081 281 257 37 01 


Gremi: uffizi da construcziun bassa
Funtauna: rg uffizi da construcziun bassa