Il focus da las professiuns da sanadad vegn a sa midar ils proxims onns. En l'avegnir èn dumandadas modas da pensar e proceduras che cumpiglian pliras professiuns. Las participantas ed ils participants da la "maisa radunda" giuditgeschan quest svilup sco schanza per la professiun da tgira. 

En il center da la discussiun da la "maisa radunda", che ha gì lieu il 1. da matg 2015 e che ha tematisà quest onn la mancanza da persunal da tgira, è stà in referat da prof. dr. Cornelia Oertle, directura da l'institut federal da scola auta per la furmaziun professiunala. Tenor las explicaziuns da prof. dr. Cornelia Oertle vegn il provediment ambulant a daventar anc pli impurtant en l'avegnir. Quest svilup vegn ad avair consequenzas per ils profils professiunals dal sectur da sanadad, e las cumpetenzas futuras dal persunal dal sectur da sanadad vegnan a sa midar. Er en la tgira dovri in pensar ed agir pli e pli integrativ e generalistic sco er l'entretschament da l'activitad cun las autras professiuns da sanadad. Dumandadas n'èn uschia betg mo las instituziuns da scolaziun dal sectur da sanadad, che ston realisar quests aspects en lur plans d'instrucziun, mabain er las instituziuns che porschan plazzas da praticum.

Las represchentantas ed ils represchentants da las instituziuns han infurmà davart la situaziun actuala areguard il persunal da tgira en ils ospitals, en las chasas da persunas attempadas e da tgira sco er tar ils servetschs da spitex. Tenor ellas ed els n'è la situaziun betg daventada pli critica cumpareglià cun l'onn precedent. En il sectur da lunga durada e tar las funcziuns spezialas è ella dentant seriusa. Las represchentantas ed ils represchentants da las federaziuns professiunalas han tematisà tranter auter il temp ch'ina persuna resta en ina professiun da tgira sco er il svilup da las absenzas e da las mancanzas. Ord vista da la "maisa radunda" èn dumandadas qua las singulas interpresas. Crear e mantegnair in bun clima en l'interpresa èn incumbensas directivas d'ina impurtanza speziala. Enconuschientscha èsi vegnì prendì da la proposta che la secziun grischuna da l'associaziun svizra da las tgirunzas e dals tgirunzs ha fatg a la federaziun grischuna "chasas ed ospitals", numnadamain da conceder ina tschintgavla emna da vacanzas per il persunal da tgira che lavura en las instituziuns dal sectur da sanadad.

Discutadas èn er vegnidas las consequenzas da l'iniziativa "Cunter l'immigraziun da massa" per il sectur da sanadad. Las participantas ed ils participants da la "maisa radunda" han appellà en quest connex a la deputada ed als deputads grischuns en las chombras federalas da s'engaschar per ch'ils interess dal sectur da sanadad vegnian resguardads en moda prioritara, cur che la regulaziun executiva vegn elavurada. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch 
 

Gremi: departament da giustia, segirezza e sanadad
Funtauna: rg departament da giustia, segirezza e sanadad