En sia ultima sesida ha la regenza grischuna prendì posiziun tar la segunda revisiun parziala da la lescha davart la planisaziun dal territori. Ultra da quai ha ella distribuì contribuziuns da la dieschma d'alcohol sco er da las taxas da patenta d'alcohol ed ha fixà l'utilisaziun da la collecta da la rogaziun federala 2015.
La regenza refusa la 2. etappa da la revisiun da la lescha davart la planisaziun dal territori
Il cussegl federal vul proteger meglier il terren cultivà, accordar las infrastructuras dal traffic e da l'energia pli baud cun il svilup dal territori e promover la planisaziun dal territori transcunfinala per far frunt a la destructuraziun da la Svizra. Perquai propona el in'ulteriura revisiun parziala da la lescha davart la planisaziun dal territori. Il chantun Grischun vul però che questa revisiun na vegnia per entant betg pli persequitada vinavant. Quai menziunescha la regenza grischuna en ina consultaziun a la confederaziun. Cun quai ha ella la medema posiziun sco la conferenza svizra dals directurs da construcziun, da planisaziun e da protecziun da l'ambient (CCPA). Ils puncts ils pli impurtants che vegnan crititgads èn la strategia mancanta dal project per l'avegnir ed il termin da revisiun memia baud. I n'exista nagin basegn d'agir urgent per in'adattaziun cumplessiva da la lescha davart la planisaziun dal territori. Prioritad sto ussa giudair la realisaziun pretensiusa e cumplexa da l'emprima etappa da revisiun sco er da la lescha davart las abitaziuns secundaras.
Pervia da las relaziuns topograficas e natiralas è il territori da muntogna confruntà cun sfidas spezialas. Quellas ston vegnir resguardadas tar ils ulteriurs pass en mira ad in project solid. Uschia èn per exempel ils funs multifuncziunals da las vals fitg impurtants per l'economia e per la societad dals territoris da muntogna. Ord vista da la regenza èsi plinavant impurtant ch'i vegnia rendì pussaivel tras lescha da considerar ils interess tar territoris che han blers biotops ch'èn protegids sin nivel naziunal (p.ex. pastgiras sitgas e prads sitgs). E la legislaziun futura sto vegnir adattada uschia ch'ils territoris da recreaziun intensiva (territoris da sport d'enviern) cumprovads en il plan directiv chantunal ed approvads dal cussegl federal na possian betg pli vegnir mess en dumonda en general. Edifizis e stabiliments per l'utilisaziun turistica duain survegnir in pais pli grond en la ponderaziun dals interess.
Communicaziun a las medias da la CCPA
Concedì contribuziuns or da la dieschma d'alcohol ed or da las taxas da patenta d'alcohol
20 organisaziuns d'utilitad publica, instituziuns, uniuns, federaziuns e fundaziuns survegnan quest onn ina contribuziun dal retgav da las taxas da patenta d'alcohol dal chantun. Totalmain vegnan pajads 532 000 francs. Tenor la lescha d'ustaria vegn il retgav net dal chantun or da la taglia dal commerzi en detagl cun bavrondas destilladas duvrà ad in terz per intents d'utilitad publica ed a dus terzs per la promoziun dal turissem.
Ultra da quai vegnan pajads ora en il chantun Grischun passa 648 000 francs da la dieschma d'alcohol da la confederaziun. Quest import è deditgà al cumbat cunter l'alcoholissem sco er al cumbat cunter l'abus da tissis enivrants, da narcotics e da medicaments. La dieschma d'alcohol è la part dals chantuns dal retgav net da l'administraziun federala d'alcohol.
Collecta da la rogaziun federala 2015
La regenza ha concludì che mintgamai in terz dal retgav da la collecta da la rogaziun federala 2015 va al "servetsch grischun da distgargia per famiglias cun confamigliars impedids", a la "Pro juventute cussegliaziun + telefon 147" ed a la "VASK dal Grischun" (associaziun dals confamigliars da persunas cun schizofrenia e cun disturbis psichics). Il di da la rogaziun federala ha lieu ils 20 da settember 2015. Il di da la rogaziun federala vegn fatga en tut las baselgias dal chantun ina collecta per intents d'utilitad publica. L'utilisaziun vegn determinada da la regenza.
La regenza approvescha la revisiun parziala da la planisaziun locala da Savognin
La revisiun parziala da la planisaziun locala, concludida da la vischnanca da Savognin ils 24 da november 2014, vegn approvada cun remartgas. En detagl vegnan approvads la revisiun parziala da la lescha da construcziun ed il plan da zonas 1:1000 "Abitaziuns per seniors ospital cirquital e chasa da persunas attempadas Surses".
Il motiv per la revisiun parziala da la planisaziun locala è la realisaziun previsa da trais edifizis cun var 24 uschenumnadas abitaziuns assistidas per seniors. Las abitantas ed ils abitants pon vegnir tgirads da l'ospital cirquital vischin e da la chasa da persunas attempadas Surses. Perquai ch'igl exista mo in dretg e betg in'obligaziun da survegnir ina tgira pon las abitaziuns vegnir duvradas da princip er en moda absolutamain independenta da l'ospital e da la chasa da dimora. Correspundentamain na pon ils edifizis planisads betg vegnir qualifitgads sco edifizis publics. Perquai ha stuì vegnir zavrada ina zona d'abitar tradiziunala per las novas chasas d'abitar.
© Comet Photoshopping GmbH / Dieter Enz
Gremi: regenza
Funtauna: rg chanzlia chantunala dal Grischun