La Svizra è actualmain londervi d'elavurar in trist chapitel da sia istorgia sociala. I sa tracta dal destin d'uffants, da giuvenils e da persunas creschidas ch'èn stadas pertutgadas da mesiras repressivas per motivs da provediment u da plazzaments en in lieu ester avant l'onn 1981. Il post da cussegliaziun per l'agid a victimas dal chantun Grischun stat a disposiziun a persunas pertutgadas sco post da contact. Anc fin la fin da zercladur 2015 pon vegnir fatgas dumondas per ina contribuziun dal fond d'agid immediat.

Fin ils onns 1980 existiva en Svizra la pratica da las uschenumnadas "mesiras repressivas per motivs da provediment" e dals "plazzaments en lieus esters". Tar las persunas pertutgadas tutgan per exempel ils uffants plazzads, ils uffants collocads, las persunas, da las qualas èn vegnidas violadas ils dretgs da reproducziun (aborts, sterilisaziuns, chastraziuns sfurzadas u senza consentiment) ubain er ils uffants adoptads sut sforz. Fin ils onns 1980 pudevan las autoritads administrativas disponer talas mesiras rigurusas, cunter las qualas las persunas pertutgadas na pudevan betg sa defender giuridicamain. Ultra da l'elavuraziun istorica d'intgins chantuns vegn actualmain lavurà vi d'ina basa legala per ina indemnisaziun finanziala a favur da las persunas pertutgadas. I vegn però anc a durar in tschert temp, fin ch'i po vegnir deliberada e messa en vigur ina lescha.

Per superar questa perioda ha la confederaziun installà il schaner 2014 in fond d'agid immediat a temp limità. Il Grischun è sa participà cun ina contribuziun da passa 120 000 francs a quest fond. Il fond d'agid immediat sustegna persunas pertutgadas che sa chattan oz en ina situaziun spezialmain greva cun ina contribuziun unica. Anc fin la fin da zercladur 2015 pon vegnir fatgas dumondas per ina contribuziun. Il post da cussegliaziun per l'agid a victimas dal chantun Grischun gida persunas pertutgadas ad inoltrar la dumonda.
Il post da cussegliaziun per l'agid a victimas dal chantun Grischun stat a disposiziun dapi l'avrigl 2013 a persunas pertutgadas da mesiras repressivas per motivs da provediment. El cusseglia e sustegna persunas pertutgadas ed intermediescha en cas da basegn contacts cun ulteriuras persunas spezialisadas sco per exempel giuristas e giurists ubain psicologas e psicologs. 

Ulteriuras infurmaziuns sin: Post da cussegliaziun per l'agid a victimas 
 

Infurmaziuns:
- Sibill Maurer, post da cussegliaziun per l'agid a victimas, tel. 081 257 31 61, e-mail Sibill.Maurer@soa.gr.ch 
- Andrea Mauro Ferroni, manader da l'uffizi dal servetsch social chantunal, tel. 081 257 26 54, e-mail Andrea.Ferroni@soa.gr.ch 
 

Gremi: Uffizi dal servetsch social chantunal
Funtauna: rg uffizi dal servetsch social chantunal