En sia ultima sesida ha la regenza grischuna beneventà las adattaziuns dal plan secturial Traffic da la confederaziun. Ultra da quai ha ella concedì il sustegn finanzial per ina nova sutgera da las Pendicularas Motta Naluns ed approvà la revisiun parziala da la planisaziun locala da Val S. Pieder. 

La regenza prenda posiziun davart las adattaziuns dal plan secturial Traffic da la confederaziun
La regenza grischuna beneventa las adattaziuns e cumplettaziuns 2015 dal plan secturial Traffic, part Infrastructura da la viafier (SIS). Il SIS s'occupa da las infrastructuras per il traffic da viafier che fan part dal champ da cumpetenza da la confederaziun. Ils objects centrals èn la planisaziun, la construcziun, la gestiun, il mantegniment e l'utilisaziun da las infrastructuras da viafier d'impurtanza naziunala. Il chantun Grischun è pertutgà concretamain da l'adattaziun e cumplettaziun dal plan secturial Traffic, e quai a Landquart. Il plan secturial Traffic cumpiglia da nov la renovaziun da la lingia cun binaris dubels da Landquart a Malans. Questa renovaziun è necessaria pervia da la concentraziun da la purschida en furma d'in augment dal tact sin la lingia da la Viafier retica da Landquart a Tavau respectivamain da Landquart a San Murezzan.
La finamira dal plan secturial Traffic, part Infrastructura da la viafier è quella da coordinar il svilup intenziunà a lunga vista da l'infrastructura da viafier cun il svilup spazial che duai vegnir prendì en mira e pia da garantir ina planisaziun pli segira per ils chantuns e las vischnancas. 
Funtauna: Plan secturial Traffic, part Infrastructura da la viafier, adattaziuns e cumplettaziuns 2015, 16-03-2015 
 
Sustegn finanzial per la nova sutgera da las Pendicularas Motta Naluns
Las Pendicularas Motta Naluns Scuol-Ftan-Sent SA survegnan en il rom da la nova politica regiunala da la confederaziun (NPR) in emprest d'in milliun francs per construir la sutgera da sis Prui-Clünas. Il chantun sa participescha a la finanziaziun cun ina contribuziun da 168 339 francs. Il project prevesa da remplazzar il runal dubel tras ina sutgera da sis cun sezs cuverts e da concepir da nov il traject en il territori da skis principal da Scuol. Tras la construcziun da questa sutgera poi vegnir fatg quint cun ina duplicaziun da las frequenzas cumpareglià cun il runal vertent. 

La regenza approvescha la revisiun parziala da la planisaziun locala da Val S. Pieder
La revisiun parziala da la planisaziun locala, concludida da la vischnanca da Val S. Pieder ils 18 da matg 2014, vegn approvada da la regenza cun ina resalva. L'object da la planisaziun è en spezial la creaziun d'ina nova zona per deponias da material. La zona serva per deponer definitivamain material da stgavament, da demoliziun e da rumida nunsmerdà. La zona determinada è per gronda part en il guaud. Perquai è necessaria ina permissiun da runcar las surfatschas correspundentas. Per ina part da la zona per deponias da material na po anc betg vegnir dada ina permissiun da runcar. Pervia da quai vegn la procedura d'approvaziun sistida ad interim per questa part. 

Nagina votaziun chantunala dal pievel ils 29 da november 2015
Ils 29 da november 2015 n'ha lieu nagina votaziun chantunala dal pievel en il chantun Grischun. La regenza ha prendì questa decisiun, perquai ch'i na dat nagins projects da votaziun chantunals ch'èn madirs per la votaziun a quest termin. Dacurt aveva gia il cussegl federal decidì da desister da realisar ina votaziun federala dal pievel ils 29 da november 2015. 
 

Gremi: regenza
Funtauna: rg chanzlia chantunala dal Grischun