Dapi la fin d'avrigl fa il servetsch archeologic dal Grischun exchavaziuns voluminusas en Val Müstair. Uschia han ins chattà restanzas istoricamain enconuschentas d'in cumplex da baselgia e d'ospizi sco er da fossas dal temp medieval. Il motiv per las exchavaziuns è in project da construcziun al sidost dal vitg.

La construcziun d'ina chasa privata cun atelier al sidost dal vitg è stada l'avrigl 2015 il motiv per emprims sondagis che duevan sclerir eventualas observaziuns architectonicas. Gia las lavurs cun maschina preliminaras per allontanar il tschispet han mussà emprimas structuras da mir en il terren. Per documentar las structuras e per conservar quellas per generaziuns futuras ha il servetsch archeologic dal Grischun fatg in'exchavaziun da salvament avant las mesiras da construcziun. Las retschertgas han revelà ina chaplutta d'ina nav d'ina grondezza da ca. 10 x 6 meters sco er l'altar ch'era sa conservà. Al vest da la chaplutta sa chatta l'areal d'in pitschen santeri cun circa 15 baras sepulidas.

La parcella da construcziun pertutgada è situada a "Sonch Antöni". Documents istorics cumprovan ch'il spiritual Johannes de Grava da Müstair aveva cumprà l'onn 1228 en quest lieu in bain immobigliar per construir là ina chaplutta ed in ospizi cun l'intent da dar albiert a viagiaturs, a malsauns ed a povers. Tenor las funtaunas scrittas n'ha l'ospizi dentant betg existì ditg. L'ultima menziun datescha da l'onn 1239. La chaplutta vegn percunter menziunada anc pli savens en il decurs da l'istorgia. A la fin dal 14avel tschientaner appartegneva la chaplutta, ch'era deditgada a "Sancta Maria Magdalena", a la claustra da Müstair. Il 17avel tschientaner è il stabiliment vegnì destruì e las ruinas èn svanidas en il decurs dals tschientaners dal tuttafatg en il terren. Sco regurdientscha è restà mo il toponim che ha sensibilisà il servetsch archeologic per il territori istoric.

L'exchavaziun precisa e la documentaziun permettan ussa da chapir meglier l'istorgia da la construcziun dal stabiliment. Uschia è la chaplutta vegnida renovada almain ina giada en il decurs da sia istorgia. Ils objects chattads – tranter auter numerus fragments da frescos e munaidas – vegnan a gidar las archeologas ed ils archeologs a reconstruir la cumparsa e l'equipament da quest monument impurtant per l'istorgia da la Val Müstair.

A la fin da las exchavaziuns, mez zercladur, vegnan studentas e students da l'institut per geodesia e fotogrammetria da la scola politecnica federala Turitg a mesirar ed a visualisar la chaplutta en trais dimensiuns cun la tecnica la pli moderna.
Santa Maria Val Müstair, survista da l'areal d'exchavaziun (sanestra), fossa dal temp medieval (dretga)


Infurmaziuns:
- Thomas Reitmaier, archeolog chantunal, e-mail thomas.reitmaier@adg.gr.ch, tel. 081 257 48 60
- Christoph Walser, manader da las exchavaziuns localas, e-mail christoph.walser@adg.gr.ch,
tel. 076 804 78 45


Gremi: servetsch archeologic dal Grischun
Funtauna: rg servetsch archeologic dal Grischun