La regenza grischuna ha deliberà la missiva tar la revisiun parziala da la lescha davart la banca chantunala grischuna (LBCG) per mauns dal cussegl grond. La LBCG è entrada en vigur il 1. d'october 1999 ed è vegnida revedida l'ultima giada l'onn 2009. En il fratemp è puspè resultà in basegn da revisiun.
Il circul da persunas che po sa participar al cussegl da banca da la banca chantunala grischuna duai vegnir extendì. Oz na dastgan persunas ch'èn activas per in auter institut suttamess a la lescha da bancas betg sa participar al cussegl da banca. Quai cuntrafa ad ina public corporate governance moderna e restrenscha nunnecessariamain la tscherna da candidatas e candidats adattads e qualifitgads per il cussegl da banca.
Intginas disposiziuns en la lescha davart la banca chantunala grischuna ston vegnir adattadas formalmain pervia da novas reglas en il dretg d'obligaziuns (DO), en ordinaziuns federalas u en circularas da l'autoritad federala per la surveglianza dals martgads da finanzas (FINMA). Ultra da quai vegnan differentas noziuns adattadas a las designaziuns u definiziuns che vegnan duvradas actualmain.
Il cussegl grond vegn a tractar la fatschenta en la sessiun d'avust 2015.
Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail
Barbara.Janom@dfg.gr.ch
Gremi: regenza
Funtauna: rg chanzlia chantunala dal Grischun