La regenza suttametta al cussegl grond la missiva per la construcziun d'in nov stabiliment giudizial serrà per 152 praschuniers a Cazas. Las investiziuns da construcziun importan circa 119 milliuns francs. Da questa summa surpiglia la confederaziun circa 33 milliuns francs. Il stabiliment giudizial existent Sennhof a Cuira duai vegnir serrà.
L'execuziun da chastis en Svizra cumbatta cunter problems da capacitad
En Svizra vegn constatada dapi in temp pli lung la tendenza che la societad giavischa dapli segirezza. Quai ha er consequenzas directas per l'execuziun giudiziala. La pretensiun da sancziuns pli lungas e pli severas ed ina pratica d'execuziun ed en spezial da relaschada pli restrictiva chaschuna che cunzunt l'execuziun serrada n'ha betg pli a disposiziun avunda plazzas. Oz mancan en Svizra circa 980 plazzas en l'execuziun da chastis e da mesiras serrada, circa 140 da quellas en il concordat da la Svizra orientala davart l'execuziun da chastis e da mesiras. Questa situaziun dastgass daventar anc pli acuta en l'avegnir.
Tras quai che la situaziun en il stabiliment giudizial Sennhof a Cuira cun 57 plazzas è insuffizienta tant ord vista architectonica sco er areguard il manaschi e cunquai ch'i dovra a medem temp plazzas d'execuziun supplementaras, ha la regenza stuì surdar ina incumbensa da planisar la construcziun d'in nov stabiliment giudizial serrà a Realta sin il territori da la vischnanca da Cazas. La nova praschun duai vegnir construida en vischinanza directa dal stabiliment giudizial avert existent e da la clinica psichiatrica Beverin sin il territori da la vischnanca da Cazas. Uschia duain vegnir eliminadas las mancanzas existentas en il stabiliment giudizial Sennhof, ed a medem temp duai vegnir cuvrida ina part dal basegn da plazzas d'execuziun serradas en la Svizra orientala. Plinavant pussibilitescha la concentraziun da l'execuziun giudiziala a Realta da trair a niz differentas sinergias cun ils manaschis vischins.
Tras la construcziun d'ina nova praschun moderna e bler pli gronda vegn l'execuziun giudiziala dal Sennhof terminada definitivamain suenter var 200 onns. Las localitads, ch'èn concepidas specificamain per il manaschi da praschun, na pon betg vegnir duvradas per autras activitads administrativas. L'areal dal Sennhof duai vegnir cedì a terzas persunas per in nov intent.
In edifizi nov effizient distgargia il quint chantunal
La regenza propona al cussegl grond da laschar construir in stabiliment giudizial serrà cun totalmain 152 plazzas. Planisadas èn 10 plazzas en la partiziun d'entrada, 100 plazzas per l'execuziun normala, 20 plazzas per delinquents cun disturbis psichics sco er 10 plazzas en la partiziun da vegliadetgna. Totalmain 12 plazzas èn previsas per l'execuziun da l'arrest d'inquisiziun, per l'execuziun da chastis da dunnas e da giuvenils sco er per chastis da detenziun subsidiars. Per il project dissegnà dal biro d'architectura D. Jüngling + A. Hagmann da Cuira vegni quintà cun custs d'investiziun da 119 milliuns francs. La confederaziun sustegna la serrada da la praschun dal Sennhof e la construcziun dal nov stabiliment giudizial a Realta. Ella ha empermess ina contribuziun da construcziun da circa 33 milliuns francs. Las investiziuns nettas dal chantun importan pia var 86 milliuns francs.
Las expensas d'investiziun per il stabiliment giudizial Realta èn exceptadas da la directiva da la politica da finanzas dal cussegl grond e n'impedeschan pia betg auters projects chantunals. Las investiziuns sa finanzieschan tras las distgargias dals onns suandants. Cumpareglià cun oz sa meglierescha il quint da gestiun previsiblamain per circa 3,4 milliuns francs per onn, e quai grazia als avantatgs da grondezza sco er grazia a dapli entradas da dunsenas dals chantuns che plazzeschan praschuniers a Realta.
Er l'economia regiunala profitescha
Tras la realisaziun dal stabiliment giudizial planisà resulta en spezial per la regiun Tumleastga/Mantogna in potenzial da valurisaziun considerabel. La nova praschun vegn a dar lavur a circa 110 collavuraturas e collavuraturs. Da quai ston var 80 plazzas vegnir occupadas dal tuttafatg da nov – circa 30 plazzas existentas vegnan transferidas da la praschun dal Sennhof. Er il mastergn dal conturn vegn a pudair profitar da la domiciliaziun da questa praschun dal concordat da la Svizra orientala. Er ord vista da l'economia publica è il nov edifizi perquai da gronda impurtanza per il chantun Grischun.
Cun las lavurs da construcziun dal stabiliment giudizial serrà a Realta duai vegnir cumenzà l'atun 2016, l'avertura è previsa il zercladur 2019.
Il cussegl grond vegn a tractar la fatschenta en la sessiun d'avust 2015.
Nov stabiliment giudizial serrà a Realta, fanestras da las cellas
Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala dal Grischun