La regenza grischuna ha deliberà per mauns dal cussegl grond la missiva tar la revisiun parziala da la lescha davart l'organisaziun giudiziala / creaziun d'ina plazza supplementara da derschadra u derschader en uffizi cumplain tar la dretgira chantunala. La dretgira chantunala dal Grischun dumonda in'ulteriura plazza da derschadra u derschader en uffizi cumplain.

Per augmentar il dumber da plazzas da derschadras e derschaders tar la dretgira chantunala dovri ina revisiun parziala da la lescha davart l'organisaziun giudiziala, perquai ch'il dumber da derschadras e derschaders da las dretgiras chantunalas supremas è fixà en la lescha.
Tant la dretgira chantunala sco er la dretgira administrativa consistan oz da mintgamai tschintg derschadras e derschaders en uffizi cumplain. La dretgira chantunala dumonda in'ulteriura plazza da derschadra u derschader en uffizi cumplain. Tenor la dumonda da la dretgira è il dumber da cas s'augmentà permanentamain durant ils ultims onns. Ultra da quai saja la dretgira chantunala dapi quest onn l'unica instanza chantunala da recurs per il nov dretg da la protecziun d'uffants e da creschids. L'augment da la chargia da lavur haja er consequenzas per la durada da las proceduras. Malgrà las stentas internas s'augmentia il mantun da pendenzas pli e pli; il dumber da proceduras pendentas saja creschì cuntinuadamain durant ils ultims onns. Difficultada vegnia la situaziun tras quai ch'ins stoppia quintar oz cun dapli lavur per cas da dretgira che pli baud. Plinavant sajan ils singuls cas daventads marcantamain pli cumplexs ils ultims onns.

Il cussegl grond vegn a tractar la fatschenta en la sessiun d'avust 2015. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun